Հիշատակի և իրազեկման նախաձեռնություն Հյուսիսային պողոտայում՝ նվիրված Լիզբոն 5-ի 35-րդ տարելիցին (լուսանկարներ)
Հյուսիսային պողոտայում մի խումբ երիտասարդներ հանդես էին եկել նախաձեռնությամբ: Նրանք տեղադրել էին պաստառներ՝ «Լիզբոն-5», «Հայկական ցեղասպանության արդարության մարտիկներ» և այլ մակագրություններով ու պաստառների վրա զետեղնել նաև լիբանանահայ 5 երիտասարդների նկարները:
Նախաձեռնության հեղինակները NEWSPRESS.am-ի հետ զրույցում նշեցին, որ իրենց նպատակն է բոլոր անցորդներին՝ Հայաստանի ու օտարերկրյա քաղաքացիներին պատմել ու ներկայացնել, թե ինչպես 35 տարի առաջ այս օրը 5 երիտասարդ Լիսաբոնում գրավեցին ու պայթեցրին թուրքական դեսպանատունը՝ ի նշան վրեժխնդրության:
Տղաները սեփական կյանքի գնով բարձրաձայնել են Հայոց ցեղասպանության ուրացման մասին հարցը:
1983 թ. հուլիսի 27-ին հայ հինգ երիտասարդները ժամանում են Պորտուգալիայում թուրքական դեսպանատան մոտ՝ երկու ամբողջովին պայթուցիկներով լցված մեքենաներով։ Երիտասարդները նախօրոք ծրագրել էին գրավել դեսպանատան շենքը, գերեվարել թուրք դեսպանին՝ այդ քայլով կարողանալով միջազգային հանրության ուշադրությունը սևեռել Հայոց ցեղասպանության և Թուրքիայի կողմից այդ փաստի ժխտման վրա։ Սակայն հայ վրիժառուներին չի հաջողվում մտնել դեսպանատան շենք։ Շենք ներխուժելու փորձի ժամանակ սկսված փոխհրաձգության ժամանակ սպանվում է Սիմոն Յահնիյանը։
Ողջ մնացած 4 հայ երիտասարդները շտապում են դեսպանության շենքին հարակից դեսպանի նստավայր, ներխուժում շենք և գերեվարում շենքում գտնվող գործերի հավատարմատարի կնոջը և տղային։ Այն սենյակը, որտեղ պահվում էին գերիները, գրոհայինները շրջապատում են պայթուցիկներով։ Նրանք սպառնում էին պայթեցնել շենքը, եթե ոստիկանությունը փորձի գրոհել այն։
Շուրջ 170 հոգուց բաղկացած ոստիկանական ուժերը շրջափակում են շենքը։ Պորտուգալիայի կառավարությունը` վարչապետ Մարիո Սուարեսի գլխավորությամբ, գումարում է արտակարգ նիստ, որի ընթացքում որոշվում է առաջին անգամ օգտագործել նոր կազմավորված ոստիկանական էլիտար ջոկատը։
Նախքան հատուկ ջոկատայինների գրոհը սկսելը, շենքում հրդեհ է բռնկվում։ Ապա լսվում են պայթյունի ձայներ։ Հայ վրիժառուները գերիներին բաց թողնելուց հետո, պայթեցնում են իրենց։
Բեյրութի ազգային գերեզմանատան այն մասը, ուր ամփոփված են Լիսաբոնում նահատակված հինգ հայ երիտասարդների ածխացած մարմինները, արդեն ավելի քան երեսուն տարի ուխտատեղի է դարձել։
Իրազեկման ակցիայի նախաձեռնող խումբի երիտասարդները վաճառում էին նաև փոքրիկ հուշանվերներ՝ վրիժառուների պատկերով: Նրանք մեզ հետ զրույցում նկատեցին, որ նպատակ ունեն ողջ հասույթը տրամադրել Բերքաբերի համայնքին՝ սահմանամերձ այս գյուղում խաղահրապարակ կառուցելու համար: