Շոգի դեմ պայքարի ինտենսիվ տարբերակի փոխարեն՝ Էջմիածնում որոշել են փակել մանկապարտեզները. արդյո՞ք պատճառը շոգն է (ֆոտո)
NEWSPRESS.am-ն արդեն տեղեկացրել է, որ Էջմիածնի քաղաքապետարանը հուլիսի 23-ից մինչև օգոստոսի 20-ը մանկապարտեզներում ստիպված է հայտարարել արձակուրդ: Այս մասին հայտնել էր Էջմիածնի քաղաքապետի ժամանակավոր պաշտոնակատար Դիանա Գասպարյանը:
Թեև քաղաքապետի ժամանակավոր պաշտոնակատարի հայտարարության մեջ նշված էր, որ Էջմիածնում հարցված1194 ծնողից դեմ է արտահայտվել ընդամենը 25-ը, սակայն մեր խմբագրություն արդեն իսկ բավականին մեծ թվով ծնողներ են զանգահարել, ովքեր խնդրել եմ բարձրաձայնել խնդիրը:
Բացի այդ, Գասպարյանի հայտարարության ներքո ևս կային մեկնաբանություններ, որոնցից ակնհայտ էր դառնում որ ծնողների մեծ մասը դժգոհ է այդ որոշումից: Նրանցից ոմանք պնդում են, որ իրենց ոչ ոք ոչինչ չի հարցրել, այլ միայն զգուշացրել են, որ հուլիսի 23-ից մանկապարտեզ չբերեն երեխաներին:
Չենք քննարկում այն, որ մանկապարտեզները հենց նրա համար են, որ հատկապես աշխատող ծնողները կարողանան կազմակերպել իրենց աշխատանքային օրը: Այս առումով, թերևս, ճիշտ չէ և օրինական չէ մանկապարտեզները մեկամսյան արձակուրդ ուղարկելը:
Մյուս կողմից էլ՝ հարկ է նկատել, որ եթե այս արձակուրդի պատճառն իսկապես շոգն է, ինչպես նշվում է հայտարարության տեքստում, ապա այս դեպքում ևս կան լուծումներ: Ամռանը շոգ է ոչ միայն մանկապարտեզում, այլև բնակարանում, սակայն մարդիկ գտնում են տարբերակներ, ինչպիսիք են, օրինակ, օդորակիչները: Բայց եթե գտնվեն ծնողներ, ովքեր դեմ կլինեն օդորակիչներին, ապա այս դեպքում ևս կան տարբերակներ: Օրինակ, Երևանի շատ մանկապարտեզներում կազմակերպվում են «ամառային ջրային կոփիչ միջոցառումներ»:
Սա, իհարկե, աշխատատար է և ջանքեր է պահանջում, սակայն մանկավարժի պարտավորություններն ստանձնած ցանկացած դաստիարակ պետք է որ խնդրին գիտակցումով մոտենա և պարտաճանաչորեն անի իր գործը՝ առանց որևէ պատճառաբանության: Մի խոսքով՝ տարբերակներ կան... Իհարկե, կրկնում ենք՝ եթե իսկապես խնդիրը շոգի մեջ է...
Կասկածներ կան, որ մանկապարտեզների երեխաներին տուն ուղարկելն ամենևին էլ կապված չէ շոգի հետ: Համենայն դեպս, ծնողները նման մեկնաբանություններ են թողել.
Նունե Վարդանյան. «Աշխարհում ամենից լավ բանը անկեղծությունն է, իսկ դուք անկեղծ չեղաք։ Չասեցիք, որ հայտնի պատճառներով խաթարվել է մանկապարտեզին սնունդ մատակարարելու գործընթացը ու այն նորից վերսկսելու համար ժամանակ է պետք... փոխարենը պատճառաբանեցիք շոգը։ Հավատացեք, անկեղծությունը ավելի կգնահատվեր»:
Մարգարիտա Խաչատրյան. «Ես 14 մանլապարտեզի ծնող եմ և ասեմ, որ իմ կարծիքը չեն հարցրել որոշում կայացնելիս։ Դրա համար էլ, Ձեր թույլտվությամբ, կարծիքս էստեղ կգրեմ։ Ես կարծում եմ, որ նոր հաճախել սկսած բալիկին արձակուրդ տալն այնքան էլ լավագույն որոշում չէ։ Հունիսից հաճախող երեխայի համար, ով նոր-նոր սկսում է ադապտացվել մանկապարտեզին, մի ամիս արձակուրդից հետո սպասվում է ադատպացիայի նոր ալիք, որն իր հետ բերելու է սթրես, լացուկոծ, ռեժիմի կրկնակի փոփոխություն (որը բալիկները չեն սիրում): Եթե էդքան անհրաժեշտ էր արձակուրդը, այն պետք է կազմակերպվեր նախքան ընդունելությունը, ասենք՝ հունիսին, երբ նախկին խումբն ավարտած կլիներ, անձնակազմը կհանգստանար և հուլիսից կընդուներ նոր խումբ... այս որոշմամբ ընդամենը երեխաներին կրկնակի սթրեսի եք ենթարկում, ու ես, որպես ծնող, շատ մտահոգված եմ, թե իմ բալիկը մի ամիս հետո ոնց կկարողանա նորից հարմարվել մ-պարտեզին»։
Մեկ այլ ծնող էլ, ով որպես ֆեյսբուքյան օգտատեր հանդես է եկել Հպարտ էջմիածինցի անվան տակ, գրել է, որ սա օրենքի կոպիտ խախտում է.
«Սենց որ գնա, Էջմիածինը օր-օրի հետ կգնա, ով ինչ ուզում՝ անում ա... մեր սիրելի վարչապետը պետք է ուշադիր լինի, անգամ խոսակցություններ են պտտվում, որ գործող քաղաքապետը պետք է մնա որպես քաղաքապետ: Այսինքն մեր երկրում էլի նախօրո՞ք են որոշում, ոչինչ չի՞ փոխվել»: