«Մենք հայրենիք չենք ազատագրել, որ էսօր անտուն մնանք»․ ազատամարտիկները անջուր, անլույս ու արդեն անհույս են
Մեկ տասնյակ ազատամարտիկների ընտանիքներ արդեն տևական ժամանակ ապրում են Մուրացանի փողոցում գտնվող շենքերից մեկում։
Թեև նրանք չունեն անհրաժեշտ կոմունալ բոլոր հարմարություններն, այդուհանդերձ, հարմարվել են իրենց վիճակին և 2005 թվականից բնակվում են այդ շենքում։ Նրանց դեռ այդ թվականից դիմել են կառավարությանը՝ բնակարան ձեռք բերելու ակնկալիքով, սակայն մինչ օրս զրկված են սեփական տանիքից։
Ազատամարտիկներին բնակատեղի են հատկացրել «մի շենքում, որի առաջին հարկն ամբողջովին զբաղեցրել է «Զինվոր» ՀԿ-ների համագործակցության համակարգող խորհուրդը՝ Մարգարիտա Խաչատրյանի՝ հայտնի Մառոզի գլխավորությամբ։
NEWSPRESS.am-ի հետ զրույցում ազատամարտիկները նկատում են, որ ՀԿ-ին պատկանող այդ մասն է շատ թե քիչ վերանորոգված, իսկ մյուս հարկերը, որտեղ ազատամարտիկներն են իրենց ընտանիքներով բնակվում, անմխիթար վիճակում են։
«Պաշտպանության նախարարն ասաց՝ գնացեք, ժամանակավոր ապրեք, տուն կտանք, բայց մեզ «քցեցին»՝ խոստացած 4 սենյականոց տան գումարի փոխարեն հազիվ մեկ սենյականոցի փող տվեցին»,- մեզ հետ զրույցում ասում է ազատամարտիկներից Գագիկ Եղիկյանը, ով այս գումարով կարողացել է աճուրդի հանված հող գնել, բայց միջոցները չեն բավականացրել, որպեսզի նաև տուն կառուցի։
Նա կնոջ, երեխաների ու թոռների հետ ստիպված տեղափոխվել է Մուրացանի 110 հասցեում գտնվող այս շինություն։
Եղիկյանն ու նրա նման էլի շատ ուրիշ ազատամարտիկներ այդպես էլ անտեսվել ու մնացել են առանց սեփական տանիքի։ Այս ազատամարտիկների մասին հիշեցին միայն 2016-ի ապրիլյան քառօրյայի ժամանակ, երբ հայրենիքը պաշտպանության կարիք ուներ։
Գնացին, մարտնչեցին, վերադարձան, ու ամեն ինչ դարձյալ մոռացվեց։
Իսկ ավելի կոնկրետ՝ այն ժամանակ Պաշտպանության նախարար Վիգեն Սարգսյանը փոխնախարար Արտակ Զաքարյանի գլխավորությամբ պատվիրակություն է ուղարկել Մուրացանի 110 շենք՝ տարածքն ուսումնասիրելու։
«Եկան, տեսան, որ էստեղ հաշմանդամ աղջիկ ա ապրում՝ 21 տարեկան Մարիամը, Զաքարյանը տպավորվեց, խոստացավ մեկ շաբաթում լուծել հարցը: Սպասեցինք, ոչինչ չարեց․․․ արդեն երկու տարի անցավ»,- մեզ հետ զրույցում ասում է մեկ այլ ազատամարտիկ։
Նոր կառավարության իշխանության գալուց հետո էլ շենքը հոսանքազրկել են ու ազատամարտիկներից պահանջում են շենքն ազատել։ Այս խնդրով վերջիններս մոտ 20 օր առաջ դիմել են արդեն նոր կառավարությանը։ Այստեղ խոստացել են օգնել նրանց։ Այժմ էլ վարչապետ Նիկոլ Փաշինյանն է համապատասխան խումբ ուղարկել ուսումնասիրելու։ Փաշինյանը խոստացել է նաև լույսն ու ջուրը միացնել․․․ ասում են՝ բոլորն ուրախացել են, հուզմունքից արտասվել, բայց ձեռնունայն են մնացել։
«Մենք ղարաբաղյան պատերազմին ենք մասնակցել, մենք ապրիլյանին էլ մի մարդու պես գնացինք, նեուժե՞լի մենք ոչ մի բան արած չունենք մեր երկրի համար․ Մենք հայրենիք չենք ազատագրել, որ էսօր անտուն մնանք»,- ասում են ազատամարտիկներն ու նրանց կանայք։
Այլ կերպ ասած՝ խոստումը՝ խոստմամբ, իսկ գործնականում ազատամարտիկներն ու նրանց ընտանիքները դեռ անջուր, անլույս ու արդեն անհույս են։