Դադարեցրեք իմ նախաձեռնության դեմ հարձակումները, այն անցնելու է. Ֆարմանյանը հակադարձում է
ՀՀ Ազգային ժողովի Հանրապետական խմբակցության պատգամավոր Սամվել Ֆարմանյանը երեկ ֆեյսբուքյան գրառմամբ անդրադարձել է բուքմեյքերական գրասենյակների գործունեության արգելման հարցին: Նրա այս գրառումը բավականին լայն արձագանք է գտել և քննարկումների առիթ դարձել, ինչին ևս Ֆարմանյանը պատասխանել է գրառմամբ:
«Երեկվա իմ գրառումը՝ օրենքով բուքմեյքերական գրասենյակների գործունեության արգելման մասին, շա՜տ լայն տարածում ու արձագանք է գտել մեր երկրում։ Ողջունելի է ինչպես գաղափարին կողմ արտահայտվող 98 տոկոս, այնպես էլ՝ դեմ արտահայտվող 2 տոկոս փաստարկները։
ԲԱՅՑ։ Հայաստանյան բուքմեյքերական ընկերությունների ղեկավարներին, սեփականատերերին հորդորում եմ՝ դադարեցնել իմ նախաձեռնության դեմ կազմակերպված արշավը, անձնական հարձակումները։ Դա ինձ շեղել չի կարող։ Իսկ հնչող սպառնալիքներին արձագանքելու եմ դրանք հավաքելով ու իրավապահ մարմիններին փոխանցելով։ Իրավապահ մարմինների ուշադրությունն եմ հրավիրում այս հանգամանքի վրա։ Ես պատգամավոր եմ ու ունեմ իրավունք՝ հանդես գալու նման նախաձեռնությամբ։ Ու այն անցնելու է։
Հ. Գ. Մի քանի ընտանիքի բարեկեցությունը չի կարող ապահովվել մի ողջ ժողովրդի «համազգային ղումարի» մեջ ներքաշելու և հազարավոր ընտանիքների դժբախտության ու խեղված ճակատագրերի հաշվին»,- գրել է Ֆարմանյանը: