Ամուլսարի հանքի հարցում կողմերն այդպես էլ համաձայնության չեկան. Փաշինյանն ասաց, որ շտապում է և հեռացավ (տեսանյութ)
Այն ժամանակ, երբ վարչապետ Նիկոլ Փաշինյանը որոշեց այցելել Սյունիքի մարզ, կարծիք եղավ, որ նրա հիմնական նպատակը ո՛չ թե սյունեցիների հետ հանդիպելն է, այլ Ամուլսարում լիները և բոյկոտողների կրքերը հանդարտեցնելը:
Այսօր արդեն Կեչուտի բնակիչների, բնապահպանների և «Լիդիան Արմենիա» ընկերության ներկայացուցիչների հետ հանդիպումը ցույց տվեց, որ այցելությունն իսկապես ինքնանպատակ չէր:
Նիկոլ Փաշինյանը հայտարարեց, որ իր ենթադրություններով իսկապես կա վարկած, թե որոշ մարդիկ ուզում են ստեղծել այնպիսի իրավիճակ, որպեսզի Հայաստանին մեծ դատական գործի մեջ ներքաշեն:
Նրա այս հայտարարությունը բնապահպաններն ընդունեցին աղմուկով: Փաշինյանը շտապեց հանգստացնել նրանց.
«Ես չեմ ասում, որ նման բան կա, բայցև չեմ ասում, որ չկա: Քննարկում ենք բոլոր վարկածները, խոսակցությունը բաց է, հիմա գծել ենք քարտեզ, որի առաջ կանգնած ենք... Գուցե իմ անձնական համակրանքն այն է, որ ամեն ծառն ավելի թանկ է, քան ցանկացած երևույթ, բայց վարչապետի դեպքում պարտավոր եմ լինել հավասարակշռված և չեմ կարող հաշվի չառնել այլ հանգամանքներ»,- ասաց նա:
Երկար քննարկումից հետո, ի վերջո, Նիկոլ Փաշինյանն ասաց, որ շտապում է և այլևս ժամանակ չունի մնալու: Ինչպես նաև հայտարարեց, որ կառավարությունն այս խնդիրը կքննարկի և իր դիրքորոշումը կհայտնի առաջիկայում:
Մինչ այդ, ցուցադրաբար դահլիճից հեռացան «Լիդիան»-ի ներկայացուցիչները, իսկ վարչապետի հեռանալուց հետո արդեն հանքի շահագործման դեմ պայքարող ցուցարարները հայտարարեցին, որ որևէ զիջում չի լինելու և պայքարելու են միչև վերջ:
Հիշեցնենք, որ 13-րդ օրն է, ինչ Ամուլսարի հանքի շահագործման դեմ բողոքող ակտիվիստները փակել են դեպի Ամուլսար տանող ճանապարհները` պահանջելով դադարեցնել հանքի շահագործումը:
Միջազգային փորձագետները, որոնք տեղում ծանոթացել են իրավիճակին, պնդում են, որ «Ամուլսարում» հանքի շահագործումը վտանգում է միջավայրը:
«Լիդիան Արմենիա» ընկերության ներկայացուցիչներն էլ իրենց հերթին են ակցիաներ կազմակերպում՝ պահանջելով չխանգարել իրենց աշխատանքին:
Ըստ ընկերության գործադիր տնօրեն Հայկ Ալոյանի՝ բողոքի ակցիաների պատճառով արդեն իսկ 3.5 միլիոն դոլարի վնաս են կրել: Ընկերությունը մտադիր է դիմել դատարան: