Միջադեպն ու իրականությունը․ ինչու են փորձում վարկաբեկել
Գագիկ Ծառուկյանի և իր անվտանգության պետ Էդուարդ Բաբայանի շուրջ տեղի ունեցող իրադարձությունները մի շարք լրատվամիջոցների ղեկավարների, քաղաքագետների ու ֆեյսբուքյան ակտիվ զանգվածի պարզապես հոգեխանգարմունքի մեջ գցեցին։
Շատերը սկսեցին հոդվածներ ձոնել առ այն, թե Գագիկ Ծառուկյանը կհեռանա քաղաքականությունից, և այդ գործընթացն արագացրեց իր թիկնազորի պետը։
Նկատենք նաև, որ Օլիմպավանում տեղի ունեցած դեպքը ով և ինչպես ցանկացավ մեկնաբանեց՝ չլսելով մյուս կողմի տեսակետը և իզուր չէ, որ իբրև թե ծեծված Վյաչեսլավ Հարությունովի կինը հարցազրույցներ տվեց և լույս սփռեց իրավիճակին։
Հատկանշական է, որ հեղափոխությունից հետո երկրում ստեղծված նոր մթնոլորտի պարագայում դժվար թե ծեծվող մարդն ու իր ընտանիքի անդամները րոպեներ անց սկսեին հերքել տարածվող լուրերը։ Հասկանալի է, որ մարդն այս նոր իրողությունների շրջանում կփորձեր պահպանել իր իրավունքները և կմեղադրեր Ծառուկյանին և այլոց՝ իրեն ծեծի ենթարկելու մեջ։ Սա խոսում է միայն Ծառուկյանի անձի դեմ տարվող դիտավորությունների և մանիպուլիացների մասին։
Հավանաբար ձերբակալությունների և բացահայտումների այս պիկին իշխանությունները փորձում են ամեն կերպ դիվիդենտներ հավաքել և յուրաքանչյուր պահ օգտագործել՝ սեփական վարկանիշի բարձրացման համար։
Եվ այս միջադեպը, որը քաղաքական աստառ ստացավ, բնականաբար, ունի նաև իրավական կողմ։ Բանն այն է, որ ծանր մարմնական վնասվածք հասցնելու կասկածանքով անձին ձերբակալել են այն դեպքում, երբ դեռևս դատաբժշկական եզրակացություն չկա: Այս ամենից բացի, այսպես ասած, տուժող կողմը բողոք չունի։ Ստացվում է՝ Էդուարդ Բաբայանի ձերբակալման որոշումն ակնհայտ ապօրինի է: