Քոչարյանը գուցե որոշի խախտել լռությունն ու իր հետ տանել Սերժ Սարգսյանին
Այսօր օրվա երկրորդ կեսին համացանցը ցնցեց տեղեկությունն այն մասին, որ ՀՀ 2-րդ նախագահ Ռոբերտ Քոչարյանը հրավիրվել է ՀՀ Հատուկ քննչական ծառայություն՝ Մարտի 1-ի գործով հարցաքնության ենթարկվելու համար:
Այս տեղեկությանը հայ հասարակությունը սպասել է ավելի քան 10 տարի: Տաս երկար ու ձիգ տարիներ մի ողջ ժողովրդի տանջել է հարցն այն մասին, թե ինչպես կարող էր սպանվել տաս անմեղ քաղաքացի ու դրա համար պատասխան չտան իշխանության համար պայքարի մեջ մտած Ռոբերտ Քոչարյանն ու Սերժ Սարգսյանը:
Ու թեև նախկին գլխավոր դատախազ, ՀՀԿ խմբակցության ներկայիս պատգամավոր Գեւորգ Կոստանյանն ասել էր, թե չկար Մարտի 1-ի գործով երկրորդ նախագահ Ռոբերտ Քոչարյանին հարցաքննելու կարիք, այնուամենայնիվ, Նիկոլ Փաշինյանը եկավ իշխանության և ցույց տվեց, որ այդ կարքին, իսկապես կա և կան բաներ, որոնք ինքն այդպես էլ չի մոռացել:
Փաշինյանը չի մոռացել Ռոբերտ Քոչարյանի՝ «Մարտի 1-ի կեսօրին ցուցարարները դուրս են գալիս ավտոբուսի հետևից՝ կրակում, հետո կրկին թաքնվում» հայտնի հայտարարությունը, կամ այն, որ Ռոբերտ Քոչարյանի օգնական Արմեն Գեւորգյանն անձամբ էր զանգել դատավորներին և սպառնալիքներով ստիպել փոխել իրենց դիրքորոշումն ու փակել այդ գործը:
Սակայն գործն այդպես էլ վերջնականորեն փակել չստացվեց, քանի որ Մարտի 1-ին կատարված ներիշխանական կրիմինալ հեղաշրջումը որպես ոսկոր խրված է Նիկոլ Փաշինյանի կոկորդում, հետևաբար, այժմ, երբ նա է իշխանությունը, պատասխան է պահանջելու ընդհատակում անցկացրած իր ամիսների ու կրած զրկանքների համար:
Փաշինյանը բացեիբաց հասկացնում է Քոչարյանին, որ այս հարցով գնալու է մինչև վերջ, ուստի խնդիրն այստեղ արդեն Քոչարյանի մեջ է: Նա պետք է ընտրի՝ շարունակել լռե՞լ, թե՞ բացել փակագծերն ու Մարտի 1-ի գործով հարցաքննվելու առիթ ստեղծել նաև երրորդ նախագահ Սերժ Սարգսյանի համար:
Թե Մարտի 1-ի գործով գլխավոր շահառուներ հանդիսացող երկու նախկին նախագահների հետագա ճակատագիրն ինչպես կդասավորվի, կխոսի՞ արդյոք Ռոբերտ Քոչարյանը՝ փուռը տալով Սերժ Սարգսյանին, պարզ կդառնա, երբ ՀՔԾ-ն հարցաքննության ենթարկվելու ծանուցագիր ուղարկի նաև Սերժ Սարգսյանին: