«Նկարիր, ուղարկիր վարչապետին, թող տեսնի՝ հիվանդներին ի՞նչ պայմաններում ենք տեղափոխում»․ հերթական խայտառակությունն Արտաշատում
Ասել, թե Հայաստանում առողջապահության ոլորտում բացեր կան, նշանակում է՝ ոչինչ չասել։ Շատ դեպքերում բացթողումների ու խախտումների թիրախում մայրաքաղաքն է, սակայն, մյուս կողմից, առավել մեծ խայտառակություն է տիրում մարզերում։ Բավական է մի փոքր հեռանալ մայրաքաղաքից ու պարզ կդառնա, թե ի՞նչ է կատարվում այդ տարածքներում։ Երեկ ֆեյսբուք սոցիալական կայքում գրառում էր կատարել ֆեյսբուքյան մի օգտատեր ու տեղադրել լուսանկար։
«Արտաշատի շտապօգնության մեքենան է։ Բժիշկը ասեց.- «Նկարիր, ուղարկիր վարչապետին։ Թող տեսնի՝ ի՞նչ պայմաններում ենք հիվանդին տեղափոխում»։
Հ.Գ. Կիսաբաց դուռը բժիշկն է պահում։ Օդորակիչի դեր է կատարում, որ մի քիչ հով լինի»,- գրել էր օգտատերը։
NEWSPRESS.am-ը կապ հաստատեց Արտաշատ քաղաքի բնակչուհի Արփինե Բաբայանի հետ, ով վերոնշյալ հրապարակման հեղինակն է։ Նա մանրամասն ներկայացրեց ամբողջ ճշմարտությունը։
«Ամսի 23-ին մայրս տանը վայր ընկավ, ոտնաթաթը կոտրվեց երկու տեղից։ Զանգեցի շտապօգնություն ու հարցրեցի, թե արդյոք ունե՞ն ազատ մեքենա։ Նրանք ասացին, որ չունեն, երկու բրիգադ է, երկուսն էլ գնացել են կանչի։
Կես ժամ հետո նորից զանգեցի, սակայն դեռ բրիգադ չկար։ Ասացի, որ կանչը գրանցեն։ Ես զգուշացրեցի, որ տուժողը ծանրամարմին է ու տեղափոխելու խնդիր կլինի, եթե հնարավոր է բրիգադում տղամարդիկ լինեն։ Շտապօգնության աշխատակցուհին ինձ մերժեց՝ ասելով․ «Մենք տենց խումբ չունենք»։
20 րոպե հետո գալիս է բժշկուհին և բուժքույրը։ Ասացի, որ կարծես թե կոտրվածք է ու հարցրեցի, թե ո՞նց ենք տեղափոխելու։ Բուժքույրն ասաց․ «Էդ դուք պետք ա դրանով զբաղվեք։ Հարևաններին ասեք»։
Մեր մուտքում տղամարդ չկա։ Ես պետք է դրսից գտնեի պատահական մի հինգ տղամարդու, խնդրեի, որ գան օգնեն։ Բժիշկն ասաց՝ եթե դեպքը գիշերը լիներ, էդ դեպքում ում էիք կանչելու, որ օգներ։
Մի խոսքով՝ վարորդն է գնում կողքի շենքի բանվորներին խնդրում, մի չորս հոգով մամային մի կերպ տեղափոխում ենք մեքենա, որ տեղափոխեն հիվանդանոց։ Իսկ գնալիս տոթ էր, օդ չկար շնչելու։
Այսօր արդեն տուն բերելուց այլ բրիգադ է գալիս։ Էլի տեղափոխելու խնդիր։ Այսօրվա բժիշկը շտապօգնության ավտոմեքենայի դուռը կիսաբաց պահել էր, որպեսզի քամի լինի ու շնչելու օդ։ Շտապօգնության ավտոմեքենան ահավոր անմխիթար վիճակում էր։ Բժիշկն ինքը կեսկատակ-կեսլուրջ ասաց․ «Նկարի, ուղարկի վարչապետին։ Թող տեսնի՝ հիվանդներին ի՞նչ պայմաններում ենք տեղափոխում»։
Դրան զուգահեռ պարզվեց, որ ԱԻՆ-ի անձնակազմը, ըստ բժշկուհու խոսքերի, հրաժարվում է համագործակցել շտապօգնության հետ, և ասել են․ «Նման դեպքերում մեզ չդիմեք»։ Մենք ապրում ենք երկրորդ հարկում ու հարևան ընտանիքի անդամներին եմ խնդրել, որպեսզի մի քանի տղաներով գան մեր բակ, մորս բարձրացնելու համար»,- պատմեց Բաբայանը։
Հավելենք նաև, որ սա առաջին դեպքը չէ, որ Հայաստանի տարբեր մարզերում ու քաղաքներում մարդիկ բողոքում են շտապօգնության ծառայության կատարած աշխատանքից, ինչպես նաև մեքենաների անմխիթար վիճակից։