Պետք է ձերբակալվեն Ռոբերտ Քոչարյանն ու Սերժ Սարգսյանը. իրավական ամբողջ համակարգը գրեթե նույնն է. Փաստանջյան
Վաղ առավոտից մի խումբ ակտիվիստներ փակել են Երևանի քաղաքապետարանի մուտքը: Նրանք ոչ մեկի չեն թողնում ելումուտ անել:
Լրագրողների ճշտող հարցին, թե ո՞րն է ակտիվիստների պահանջը՝ քաղաքապետ Տարոն Մարգարյանի հրաժարակա՞նը, ակտիվիստներից Միքայել Նազարյանը պատասխանեց, որ այս պահին հիմնական պահանջը հրաժարականը չէ:
«Ներսում իրականացվում են ուսումնասիրություններ, և մենք մուտքը պահելով՝ այս պահին խթանում ենք հանցագործության բացահայտմանը, որպեսզի ոչ ոք ելումուտ չանի»,-ասաց ակտիվիստը՝ պարզաբանելով, որ խոսքը վերաբերում է քաղաքի բյուջեի մսխմանը:
Թե ինչու քաղաքացիները որոշեցին հենց այսօր ակցիա կազմակերպել, նրանք ունեն իրենց բացատրությունը. երեկ երեկոյան դիտել են տեսանյութ, որտեղ նշվում է, թե Տարոն Մարգարյանն իր ողջ կյանքում լինելով բացառապես պետական պաշտոնյա՝ կուտակել է զգալի ունեցվածք: Այժմ ակտիվիստները պնդում են, որ քաղաքապետարանը դեպքի վայր է, և իրավապահները պետք է զբաղվեն ուսումնասիրություններով, ու իրենք ապահովում են ապահով գործի ընթացքը:
Ի դեպ, հանրահավաքը կազմակերպել է «Երկիր Ծիրանի» կուսակցությունը, որի նախագահ Զարուհի Փոստանջյանը ևս ակտիվիստների հետ է: Նա նշում է, որ Տարոն Մարգարյանի տեղը գաղութն է:
Զարուհի Փաստանջյանի կարծիքով՝ իրավապահները դանդաղ են աշխատում, մինչդեռ քաղաքապետին վաղուց պետք է արդեն բանտարկած լինեին:
«Իրավապահները նաև պետք է շտապեն ձերբակալել Ռոբերտ Քոչարյանին ու Սերժ Սարգսյանին: Եթե իրապես հեղափոխություն է տեղի ունենում, ուրեմն համակարգային փոփոխություն է լինելու, ապամոնտաժվելու են նաև տեղական իշխանությունը: Բայց փոխվել է միայն կառավարության դեմքը, մնացել են նախկին իրավապահ համակարգի հիմնական աշխատողները»,-ասում է Փոստանջյանն ու մատնանշում, թե ովքեր են մնացել նախորդ համակարգից:
Այդպես նա նշում է ԱԱԾ պետի տեղակալի անունը և նկատում, որ նա եղել է նաև ԱԱԾ նախկին պետ Գորիկ Հակոբյանի տեղակալը: Դատական համակարգում էլ գրեթե ամբողջությամբ նախկին ներկայացուցիչներն են: ԱԺ-ում մեծամասնությունը նախկին թալանիչներն են: ՀՀԿ-ում մարդիկ են, ովքեր բռնություններ են իրականացնում և շարունակում են պաշտոնավարել: Մինչդեռ նրանց նկատմամբ պետք է քրեական հետապնդում իրականացվեր: Նա վստահ է, որ իրավապահ մարմինները վաղուց գիտեն, թե ովքեր են թալանել և ում պետք է հետապնդել, բայց հապաղում են նրանց նկատմամբ հետապնդումը: