Առողջապահության նախարարությունն արձագանքել է Վարդենիսի հիվանդանոցի փակմանը վերաբերող՝ NEWSPRESS․am-ի հրապարակմանը
NEWSPRESS.am-ն անդրադարձել է «Վարդենիսի հիվանդանոց» ՓԲԸ-ի փակման հետ կապված խնդրին։ Բժշկական հաստաությունը կմիանա զինվորական հոսպիտալին, որը գործում է նույն տարածքում։
Արձագանքելով հրապարակմանը, Առողջապահության նախարարի խոսնակ Լիանա Եղիազարյանը մեզ հետ զրույցում նշեց, որ այս երկու բուժհիմնարկները եղել են թերծանրաբեռնված, ու քանի որ երկուսում էլ նույն բժշկական ծառայություններն են մատուցվել, ուստի դեռ նախորդ կառավարության ժամանակ որոշում է կայացվել միավորել բուժհիմնարկները։
«Այս բուժհաստատությունները միևնույն շենքի տարբեր թևերում են և դրանց օպտիմալացումը նպատակահարմար էր և արդյունավետ՝ բուժսպասարկման համար, քանի որ այս կերպ ծառայությունների կրկնությունը բացառվում է»,-ասաց Լիանա Եղիազարյանը՝ հավելելով, որ հոսպիտալում չի եղել միայն ծննդատան ու շտապօգնության բուժսպասարկումը, որոնք կկենտրոնանան մեկ բուժհաստատությունում։
Ինչ վերաբերում է կրճատումներին, ապա Լիանա Եղիազարյանը վստահեցնում է՝ որևէ բժիշկ չի կրճատվի, բայց հնարավոր են կրճատումներ կրտսեր և միջին բուժանձնակազմի շրջանում։
«Ոչ միայն բժիշկներ չեն կրճատվի, այլև մարզային այդ բուժհաստատությունում դեռ թափուր հաստիքներ կլինեն։ Ինչ վերաբերում է կրտսեր և միջին բուժաշխատողների կրճատմանը, ապա այս պահին հստակ չեմ կարող ասել, թե նրանցից քանիսը կկրճատվեն, քանի որ ընթացիկ գործընթաց է, և օպտիմալացումը դեռ գործընթացի մեջ է: Ամեն դեպքում՝ ամեն ինչ արվում է որակի ապահովման և օպտիմալության շրջանակում»,-նշեց նախարարի խոսնակը։