Փաշինյանը պաշտպանում է քաղաքացիների իրավունքները, մեկն էլ ես եմ․ «Ոսկու աշխարհ»-ի տնօրենը բարձրացրել է վարձավճարները
«Վաղարշ և որդիներ» ՍՊԸ-ին պատկանող «Ոսկու աշխարհ» տոնավաճառի աշխատակիցները հավաքվել են շուկայի շենքի մոտ և բողոքի ակցիա են իրականացնում։ Ակցիա մասնակիցները պահանջում են իջեցնել տաղավարների վարձավճարները։
Բանն այն է, որ հունվար ամսից տաղավարների մի մասի համար 35 հազար դրամ վճարի փոխարեն աշխատակիցներն սկսել են վճարել 50 հազար դրամ, իսկ սրահների մյուս մասի անբարեկարգ վիճակի պատճառով՝ աշխատակիցները շարունակում էին վճարել 35 հազար դրամը։
Այժմ նոր կառավարության որոշման համաձայն՝ վճարները պետք է իջնեն 20 %-ով, սակայն 35 հազար դրամից 20 % հանելու փոխարեն, տնօրինությունը ավելացրել է նրանց վճարը 5 հազար դրամով։ Վերջիններս պետք է վճարեն 40 հազար դրամ։
Լրագրողների հետ զրույցում աշխատակիցները նկատում են, որ 35 հազարը պետք է դառնար 28 հազար, սակայն, չգիտես ինչ հնարքով, հակառակ էֆեկտն է ունեցել կառավարության որոշումը։
«Հիմա մենք էս ոսկին վերցնենք ո՞ւր գնանք, ախր պայմաններ էլ չկան, տեղը շոգ, նեղ․․ էս սրահի մուտքն էլ նոր է բացվել, ու գնորդներ չկան, ինչո՞ւ պետք է ավելացնեն մեր վճարները»,- նեղսրտած ասում է աշխատողներից Նարինեն։
Շուկայի սեփականատեր Վաղարշ Աբրահամյան էլ պարզաբանում է, որ 20 տոկոս զեղչը կատարվել է 50 հազար դրամից, դրա համար էլ վարձավճար է ֆիքսվել 40 հազար դրամը։ Իսկ այս ամենն արվել է պայմանագրով։ Մյուս կողմից էլ՝ աշխատողները պնդում են, որ այդ պայմանագրերը ստիպողաբար են իրենց կնքել տվել։
«Ես միշտ ընդառաջել եմ աշխատողներին, ուղղակի հիմա նրանք օգտվում են առիթից, որ Նիկոլ Փաշինյանը եկել է իշխանության ու իրավունքներ է տվել իրենց։ Ես էլ եմ ուրախ, որ եկել է Փաշինյանը ու պաշտպանում է քաղաքացիների իրավունքները, բայց էդ քաղաքացիներից մեկն էլ ես եմ, բա իմ իրավունքները ո՞վ պաշտպանի»,- ասում է Վաղարշ Աբրահամյանը։
Ամեն դեպքում, աշխատողները պատրաստ չեն բարձր վարձավճարներով աշխատել, քանի որ պնդում են, որ առևտուր չունեն և պահանջում են կառավարությունից լուծել իրենց խնդիրը։
«Էսքան աշխատող դրսում ա մնում, թող կառավարությունը մտածի, թե ինչ ա անելու»,-ասում են աշխատողները։