Զինվորը գնացել էր, գողը՝ մնացել
Հայաստանը տակնուվրա արած լուրը՝ Մանվել Գրիգորյանի ձերբակալությունը և առանձնատան բացահայտումները այսօր արդեն հստակ գնահատականներ է ստանում տարբեր կուսակցությունների և քաղաքական գործիչների կողմից։
Նախ՝ ԱԺ փոխնախագահ Էդուարդ Շարմազանովը բանակին տրված մթերքի, ռազմամթերքի, հանգանակությունների յուրացման իրողությունը գնահատեց որպես «ազգի դավաճանի» արարք:
«Ելք» խմբակցության պատգամավոր Էդմոն Մարուքյանը նշեց, որ մեղավորները պետք է պատասխանատվության ենթարկվեն, իմացող-թաքցնողները՝ նույնպես, իսկ ՀՀԿ խմբակցությունը պետք է քաղաքական դիրքորոշում հայտնի և աջակցի իրավապահ մարմիններին։
Մարուքյանը շեշտեց, որ վաղը արտահերթ նիստ կա, օրակարգում կարող է ընդգրկվել նաև ԱԺ պատգամավորին անձեռնմխելիությունից զրկելու մասին հարցը: Այնտեղ երկու կոմպոնենտ կա՝ մեկը քրեական հետապնդումն է, մյուսը՝ ազատությունից զրկելու մասին է:
ԱԳՆ մամուլի խոսնակ Տիգրան Բալայանն, իր հերթին, ճեպազրույցի ժամանակ ասաց, որ կոռուպցիոն բացահայտումները միայն կբարձրացնեն Հայաստանի հեղինակությունը միջազգային ասպարեզում։
ՀՀԿ-ն հայտարարություն տարածեց, որտեղ Մանվել Գրիգորյանի յուրացումերը գնահատեց «անընդունելի ու զազրելի», շեշտելով, որ նա պետք է պատասխան տա օրենքի առջև:
ՀՅԴ խմբակցության ղեկավար Արմեն Ռուստամյանն այս իրավիճակը նաև այլ լույսի ներքո է դիտարկել․ այն է՝ այն ինչ տեղի է ունենում Հայաստանում, նաև Ադրբեջանում է մեծ արձագանք ստացել․ Արցախի հերոսը, ում անունը կապված է Արցախում հողերի ազատագրումների հետ, նման պատմությունների մեջ է, նաև դա օգտագործելու են մյուս հերոսներին վարկաբեկելու համար։
Ի դեպ, պատգամավորը փորձել է հասկանալ նաև, թե ինչո՞ւ էին զինվորներին ուղղված երեխաների նամակները այսքան ժամանակ մնացել Մանվել Գրիգորյանի առանձնատանը: Ըստ նրա՝ այս պարագան անտրամաբանական է։
Իսկ Մանվել Գրիգորյանի օգնական Մեսրոպ Մանուկյանը շեշտեց, որ կա անմեղության կանխավարկած և կխոսի, երբ ամեն ինչ պարզվի։
ՀԳ։ Ի դեպ, երբ խոսում են 50 տոկոսի, շաքարավազի, ճանապարհի, վարկերի, բյուջեի մասին, թալանն այնքան ցավագին չի լինում հանրության համար, որքան բանակից սնունդ ու հագուստ յուրացնելը։ Այսօր Մանվել Գրիգորյանը ոչ միայն թքեց սեփական բանակի կողմը, նաև նսեմացրեց Արցախի հերոսի կոչումը։
Հայ մարդը գնա, պայքարի Արցախում և գա ու օրերն ավարտի որպես մի սովորական գո՞ղ։ Մանվելը Բաքուն էր որոշել գրավել, բայց այսօր խայտառակեց թե՛ իրեն, թե՛ կոչումը, թե՛ զինվորականի պատիվը, թե՛ հերոսների հիշատակը․ այսքանից հետո մարդն ի՞նչ խղճի բեռով է ապրելու՝ սովորական գողի՞. այնպես չէր, որ նա աղքատ էր, սակայն եղածով չբավարարվեց: Զինվորը գնացել էր, գողը՝ մնացել։