«Սպայկա»-ի արկածները ծիրանի դաշտում-2
Արարատյան դաշտում ծիրանի բերքահավաքն իսկական եռուն շրջանում է, շարունակվում է մեծածավալ բերքահավաքը և արտահանումը։
Արդեն անդրադարձել էինք, որ «Սպայկա»-ի հետ այգու սեփականատերերի աշխատանքներն այնքան էլ հարթ չեն ընթանում։ Նշենք, որ նախորդ տարիներին ևս շատ էին «Սպայկա»-ից դժգոհությունները, անընդհատ կանգնեցնում էին խնդիրների առջև, չէին տանում, միայն խոշորներն էին տանում, գինն էին անհարկի նվազեցնում և այլն։
Այս տարի արդեն փորձում են ծիրանի արկղերի մեջ փող աշխատել․ թեթև արկղը ծանր են հաշվում, իսկ մնացածը՝ գրպանում։
Պարզվում է, որ այսքանը դեռևս վերջը չէ «Սպայկա»-ից։ Նախորդ օրերին նրանք անգամ չեն եկել բերքահավաքի վայր, անգամ արկղեր չեն բերել՝ խաբելով մարդկանց։
Բերում են տարբեր պատճառաբանություններ, որ այլևս տեղ չկա, կամ չեն կարող տանել, սակայն իրականում «Սպայկա»-ի հիմնական գործը մարդկանց խաբելն է։
Մարդիկ նախորդ օրերին սպասել են, սակայն ծիրանը հասնում է և այնքան են վարժվել խարդավանքներին, որ արդեն դժգոհ են, որ անգամ արկղերի հետ կապված նման խաբեության դեպքում ծիրանն ընդունեն։
Դա երևի քաղաքականություն է․ մարդկանց դնել այնպիսի վիճակում, որ համակերպվեն ստորացուցիչ պայմաններին, և քանի որ «Սպայկա»-ն մասնավոր ընկերություն է, ապա որևէ մեկին դիմել չեն կարող։
Այսօր արդեն «Սպայկա»-ն 200 դրամով է ծիրանն արտահանում, դարձյալ պայմանագիր չկա սեփականատերերի հետ, ոչ էլ որոշակի գին, հիմնականում բանավոր համաձայնությամբ են ծիրանն ընդունում։
Մի երկու անգամ փորձել են ճանապարհ փակել Արարատի մարզում՝ ծիրանի գինը բարձրացնելու համար, սակայն հասկացրել են, որ անիմաստ է, միևնույնն է ավելի բարձր գնով, կամ այն գնով, ինչ նախկին տարիներին է, չեն տանելու և ծիրանի այգետերերին մնացել է ծիրան իրացնել այն գնով, որ նախորդ տարիներին չէին իրացնում։