Համբարձումյանն իրեն վտանգի տակ դրեց. ի՞նչ կանի ԱԱԾ-ն
Հայաստանում թավշա հեղափոխությունից հետո ԱԱԾ մանրադիտակի տակ են հայտնվել գործարարները, մասնավորապես, այն դեմքերը կամ հիմնարկները, որոնք առավել լայն ճանաչում ունեն և սկանդալ հարուցող են:
Մի կողմից ԱԱԾ-ն և նոր իշխանություններն իրենց հեղափոխական դիմագիծն են ընդգծում, մյուս կողմից՝ անօրինական գործունեություն ծավալողների աչքն են վախեցնում՝ այդ կերպ երկրում փոփոխությունների մթնոլորտ ստեղծելով:
«Նորֆոլկ Քընսալթինգի» դեմ գործը սկսվեց, քանի որ հետևում կանգնած էր նախկին ՊԵԿ նախագահ Վարդան Հարությունյանը, Երևան հիմնադրամի դեմ շոուն կազմակերպվեց Տարոն Մարգարյանին մատ անելու համար, իսկ «Ալեքս Գրիգ»-ում էլ, իհարկե, Սամվել Ալեքսանյանի անձով պայմանավորված:
Պնդում կա, որ մեկ առ մեկ անցնելու են հայտնիների օբյեկտներով և չեն խնայելու նրանց, ովքեր իրենց կողքին չեն:
ՀՀԿ-ում մնալով, ավելին՝ մնալու մասին հպարտորեն հայտարարելով՝ իրեն վտանգի առաջ կանգնեցրեց հատկապես պատգամավոր Արկադի Համբարձումյանը, ով հայտնի գործարար է, հայաստանյան տարբեր շուկաներում մոնոպոլ և ծավալուն դիրք ունի, օրինակ, իրեն պատկանող «Դերժավա» ընկերությունը զբաղեցնում է շոկոլադի շուկայի 23 տոկոսը և իրացման ծավալներով առաջինն է ՀՀ-ում՝ գերազանցելով անգամ «Գրանդ Քենդիի» ծավալները: Վերոնշյալ ընկերությունն է, որ ներմուծում է «Սնիկերս», «Մարս», «Կիթ-կաթ», «Թվիքս» և այլ շոկոլադե սալիկներ:
Նրան է պատկանում սննդի հայտնի KFC ցանցերը, որտեղ օգտագործվում է միայն թռչնամիս, իսկ դրա մատակարարմամբ էլ զբաղվում է կրկին նույն սեփականատիրոջը պատկանող Սպիտակի թռչնաբուծական ֆաբրիկան, իսկ սպառման ծավալների մասին կարելի է ուղղակի պատկերացնել:
Ավելին՝ Արկադի Համբարձումյանն իր հոր հետ հյուրանոցային ծավալուն շինարարություն է սկսել՝ ԵՊՀ հյուրատան վաճառված շենքում:
Իհարկե, թվարկվածները իր ունեցածի դեռ ամբողջական ցուցակը չէ և այս պարագայում Արկադի Համբարձումյանն իր հայտարարություններով իրեն դրեց նեղ դրության մեջ, քանի որ այդ կերպ կարող է հայտնվել Փաշինյանի և ԱԱԾ-ի ուշադրության կենտրոնում: