«Արցախում բոլորս աշխատում ենք 7-8 հոգու համար»․ Ինչի՞ համար է պայքարում Արցախի երիտասարդությունը (ֆոտո)
Արդեն երրորդ օրն է, ինչ Արցախում դադարել են ցույցերը ու դրան զուգահեռ տեղի են ունենում հրաժարականներ ու նոր նշանակումներ։ Սակայն արցախցիները շարունակում են գրել իրենց դիմում-բողոքները։ Ինչպես «Թավշյա հեղափոխության» ժամանակ Երևանում, այնպես էլ Ստեփանակերտում ցույցերի կորիզը համարվում էր երիտասարդությունը։
Ուսանողուհի Նադեժդա Աղաջանյանն արդեն 6-րդ օրն է, ինչ մասնակցում է մայրաքաղաք Ստեփանակերտում տեղի ունեցող ակցիաներին։ NEWSPRESS.am-ի հետ զրույցում նա ընդգծեց, թե ի՞նչ խնդիրներ ունեն Արցախում երիտասարդներն ու ինչի՞ դեմ էին բողոքում նրանք։
«Այստեղ նույնպես գերակշռող են երիտասարդները, ովքեր առաջին օրվանից ցույցերի կիզակետում են։ Մենք շատ ենք նամակներ գրել ու մեր բողոքներն արտահայտել, սակայն չեն պատասխանել ու արհամարհել են։ Մենք չենք ցանկանում, որ պետությունը արհամարհի երիտասարդների դիմում-բողոքները։ Երիտասարդների իրավունքները պաշտպանված չեն ու կարելի է ավելի ազատ ու անկախ ապրել։ Հիմնական պատճառները սրանք են, որի համար Ստեփանակերտի երիտասարդությունը ոտքի կանգնեց։ Մենք ցանկանում ենք, որ արդարությունը վերականգնվի»։
Ուսանողուհին ընդգծեց, որ համալսարաններում նույնպես խայտառակ վիճակ է, ու այնտեղ նույնպես ոտնահարվում են երիտասարդների իրավունքները։
«Համալսարաններում կաշառակերություն է, որի դեմն առնելն անհնար է երևում։ Դրա հետ մեկտեղ գրեթե ամեն օր գումար ենք հավաքում դասախոսների համար։ Պատկերացնում եք, որ դասախոսի գիրքը չգնելու դեպքում չես կարող քննության մասնակցել։ Այսպիսի բաներ այստեղ նույնպես կան։ Ակնկալում ենք, որ այս փոփոխությունները դրական կանդրադառնան բոլորիս կյանքի վրա։ Պետության բյուջեն պետք է լինի ժողովրդինը, ոչ թե իշխանավորներինը։ Արցախում բոլորս աշխատում ենք 7-8 հոգու համար։ Այդ իսկ պատճառով էլ փողոց դուրս եկանք, քանի որ անարդարությունն ավելի մեծ տեմպերով էր առաջ գնում»։
Ընդգծենք նաև, որ մշակույթի պալատում երիտասարդները շատ են, ովքեր օգնում են տարեցներին դիմումները գրելու հարցում, ինչպես նաև սպասում են, թե ի՞նչ դրական փոփոխություններ կբերի այս մի քանի օր տևած ընդվզումը։