Ես ընտրված մարդ եմ, ինչի՞ պիտի տեղս զիջեմ. Հրազդանի քաղաքապետը՝ աթոռը Սասուն Միքայելյանի որդուն «փոխանցելու» մասին
Ո՞ր օրենքով ինձ պետք է հանեն և ինչի՞ համար: Այդ մասին NEWSPRESS.am-ի հետ զրույցում ասաց Հրազդանի քաղաքապետ Արամ Դանիելյանը՝ անդրադառնալով «Հրապարակ» օրաթերթի այն հրապարակմանը, թե Ազգային ժողովի «Ելք» խմբակցության պատգամավոր Սասուն Միքայելյանը պատրաստվում է որդուն՝ 25-ամյա Սևակ Միքայելանին դարձնել Հրազդանի քաղաքապետ:
«Ես ինչի՞ պիտի իմ տեղը զիջեմ Սասուն Միքայելյանի որդուն, ես ընտրված մարդ եմ, ինձ 15 հազար մարդ ձայն է տվել, ինչի՞ համար զիջեմ: Քաղաքապետը պետք է ընտրվի օրենքով սահմանված կարգով»,- ասաց Դանիելյանը:
Հարցին, թե ինքը տեղյա՞կ է՝ հնարավո՞ր է բողոքի ակցիաներ կազմակերպվեն ու պահանջեն իր հրաժարականը, ինչպես, ասենք, Երևանի դեպքում էր, Դանիելյանն ասաց, որ ինքը նման տեղեկություն չունի:
Հրազդանում քաղաքապետի ընտրությունները կայացել են 2016 թվականի ապրիլի 17-ին: Արամ Դանիելյանը, հավաքելով 12 510 ձայն՝ դարձել է Հրազդանի քաղաքապետ: Նրա հիմնական մրցակիցը հենց Սասուն Միքայելյանն էր, ով հավաքել էր 10 267 ձայն: