«Փոխանցեք Փաշինյանին և նախարարներին հետևի դռնով թաքուն չգնան». Սանասարյանը չլսեց ցուցարարներին
Կառավարության նիստից առաջ բողոքի ակցիաներ կազմակերպած քաղաքացիները մոտեցան նիստի շտապող Պետական վերահսկողական ծառայության պետ Դավիթ Սանասարյանին: Դեռ չէին հասցրել նրանք ներկայացնել իրենց խնդիրները, երբ Սանասարյանն ասաց, որ պետք է դիմել միայն նամակների միջոցով:
Քաղաքացիներից մեկը այնուամենայնիվ սկսկեց ներկայացնել խնդիրը, սակայն Սանասարյանն ընդհատեց.
«Ես նոր եմ նշանակվել պաշտոնում, դեռ մեկ ամիս է և չեմ կարող պատասխան տալ նախորդների արածների համար»,-ասաց Սանասարյանը՝ չլսելով, որ քաղաքացին իրենից պարզապես օգնություն է խնդրում՝ իր խնդիրը լուծելու համար:
Դավիթ Սանասարյանը փորձեց արագ հեռանալ, սակայն այս անգամ էլ նրան լրագրողները մոտեցան՝ հարցով, թե կողմնորոշվել է արդյոք նա, որ կառույցներից ստուգումներ սկսել, քանի որ վերջինս ֆեյսբուքյան իր էջում դիմել էր օգտատերերին՝ օգնել իրեն այդ հարցում:
Վերջինս պատասխանեց, որ արդեն մոտավոր պատկերացում ունի, բայց այդ մասին դեռ չի կարող ասել:
Այդ ժամանակ նրան մոտացան քաղաքցիներ և խոստացան օգնել կոռումպացված ոլորտները բացահայտելու հարցում:
«Եթե դուք չգիտեք, ես ձեզ կասեմ, որ ոլորտներ են դրան»,-ասաց տղամարդը և հավելց. «Խնդրում եմ փոխանցեք պարոն Փաշինյանին և նախարարներին հետևի դռնով թաքուն չգնան, այլ դուրս գան և լսեն ժողովրդին»:
Սանասարյանը հույս հայտնեց, որ նախարարները դուրս կգան և մտավ շենք: