Այսօր կառավարության տոնն է
Այսօր Երեխաների պաշտպանության օրն է: Ամեն տարի նշվում է այս օրը` հատուկ, սակայն այս տարի Երեխաների պաշտպանության տոնը հատուկ պատճառ ունի:
Այսօր այս առումով կառավարության անդամների բախտն ուղղակի բերել է. նշանակված պաշտոնյաների տարիքը հասել է 21-ի, ինչը հույսեր է ներշնչում, որ Հայաստանում երեխաների իրավունքները լիուլի պաշտպանված են: Նրանք անգամ կառավարությունում են, բոլոր կողմերից պաշտպանված, հանգիստ պաղպաղակ են ուտում, նրանց սիրում են, ջերմ խոսքեր ասում, նրանց համար սոցիալական ցանցերում մնացյալք կոկորդ են պատռում, և այս ամենը միայն նրա համար, որ մեր երեխաները երջանիկ ապրեն, խաղաղ ապրեն և անպայման հանգիստ պաղպաղակ ուտեն:
Կառավարությունում անգամ երեխաները կարող են իրենց ազգականներին, ծանոթներին, մանկության խաղընկերներին բերել, միասին համակարգչով կռիվ-կռիվ կխաղան կամ էլ ռալլի քշեն. նրանց իրավունքներն ամբողջովին պաշտպանված են:
Երևի միջազգային կառույցները հույս չունեին, որ Հայաստանում այդքան շուտ կլուծվեն երեխաների հիմնախնդիրները և նրանց ոչ թե կտանեն մանկապարտեզ կամ դպրոց, այլ ուղիղ կառավարություն` ամենաապահով վայրը:
Ասում են՝ հարևան երկրներում այդ ծրագրերն են մշակվում, թե ինչպես Հայաստանից օրինակ վերցնեն և իրենց երեխաներին ապահով տեղավորեն կառավարություններում, որտեղ նրանք կարող են հանգիստ մեծանալ, զարգանալ, կրթություն ստանալ, ինչո՞ւ չէ, նաև պաղպաղակ ուտել, հրավիրել իրենց մանկության ընկերներին, բակի ընկերներին էլ` ֆուտբոլ կամ գնդակ խաղալու:
Իհարկե, պատահում է, որ մեկ-մեկ քաշքշում են միմյանց, գոռգոռում են ուրախությունից: Դե երեխաներ են, պետք է որևէ կերպ էներգիան ծախսեն, հո չե՞ն նստելու ամբողջ օրը գործ անեն, չէ՞ որ երեխաները դրա համար նախատեսված չեն, պետք է սպասել, որ նրանք մեծանան, հասունանան, իսկ որևէ մեկի մանկությունը խաթարել պետք չէ:
Նրանք կարող են նաև նկարվել, նկարները տեղադրել Ֆեյսբուքում, ընկերներին ուղարկել, տառասխալներ անել, աշխարհագրություն չիմանալ,,նաև հաշվել` ներելի է: Մենք բոլոր ներողամիտ ենք մանուկների հանդեպ` դե ճանապարհ ունեն անցնելու, կարևորը, որ մեր աչքի առաջ մեծանան, կառավարության տանիքն ունենան գլխավերևում, ձեռքներին չպակասի պաղպաղակը, միշտ սիրված լինեն և ընկերներով գնան խաղալու:
Թող կառավարությունում միշտ երգ ու պար, զվարճանք ու մանուկների ճիչեր լսվեն` չէ՞ որ այսօր նրանց տոնն է: