22 դրամաշնորհից օգտագործվել է 13-ը. նախարար
Այսօր ԱԺ եվրոպական ինտեգրման հարցերի ու ֆինանսավարկային և բյուջետային հարցերի մշտական հանձնաժողովների hամատեղ նիստում քննարկվում էր «ՀՀ 2017 թ. պետական բյուջեի կատարման մասին» տարեկան հաշվետվությունը: Այն ներկայացրեց ՀՀ ֆինանսների նախարար Ատոմ Ջանջուղազյանը:
«Առանձին վերցված կոնկրետ ծրագրեր 2017 թվականի բյուջեի ծախսային մասում չունեն, որոնք ուղղված են եվրաինտեգրման գործընթացին, բայց ունեն բազմաթիվ ծրագրեր, որոնք իրենց ծագումով եվրոպական են։ Մենք ունենք ծրագրեր, որոնք իրականացվում են եվրոպական աղբյուրների հաշվին՝ թե վարկային, թե դրամաշնորհային ռեսուրսներով։ 2017-ի բյուջեում ունեցել են 20 ծրագիր, որոնք նախատեսված են եղել իրականացնել վարկային միջոցների հաշվին, սակայն փաստացի իրականացվել են 9 վարկային ծրագիր։ Ընդհանուր առմամբ, վարկային գումարները եղել են 31,6 մլրդ դրամ նախատեսված և դրանից օգտագործվել է 28,9 մլրդ դրամը»,- ասաց նախարարը։
Ջանջուղազյանը ներկայացրեց խոշոր ծրագրերը, որոնցից են Վանաձոր-Ալավերդի-Վրաստանի սահման Մ 6 ճանապարհի կառուցումը, Վեդու ջրամբարի կառուցման համար Ֆրանսիայի հանրապետությունից ստացած վարկային միջոցները և այլն:
«Ունեցել ենք նպատակային 17 դրամաշնորհ, որոնք տարվա ընթացքում դարձել է 22, բայց փաստացի օգտագործվել է 13-ը։ Ընդհանուր առմամբ, շուրջ 26 մլրդ է եղել, որի դիմաց ունենք ցածր կատարողականություն՝ 8 մլրդ դրամ»,- հաղորդեց նախարարը: