Ագարակում հացադուլ հայտարարած քաղաքացիները դադարեցնում են հացադուլը
Սյունիքի մարզի Կուրիս (նին Կուրավանք) գյուղի բնակիչ 31-ամյա Բորիս Անդրեասյանը դադարեցրել է հացադուլը։
NEWSPRESS.am-ն արդեն անդրադարձել է, որ Ագարակի հանքարդյունաբերության մեծ թափն անհանգստացրել է տեղի բնակիչներին, և որպես բողոքի նշան, Բորիս Անդրեասյանը հացադուլ էր հայտարարել։ Նրան էր միացել նաև իր ընկերը՝ սոչիաբնակ Գագիկ Հարությունյանը։ Անդրեասյանի ինքնազգացողությունը թեև կտրուկ վատացել էր, սակայն նա չէր դադարում բոյկոտը։ Եվ միայն այսօր՝ վարչապետի հայտարարությունից հետո, նրանք որոշել են դադարեցնել հացադուլը։ Փաշինյանը, մասնավորապես, նշել է, որ ստուգումներ կանցկացվեն մետաղական հանքերով զբաղվող կազմակերպություններում։
Բորիս Անդրեասյանն ու Գագիկ Հարությունյանը հայտարարություն են տարածել, որում մասնավորապես ասվում է․
«Սիրելի հայրենակիցներ,
մենք դադարեցնում ենք մեր հացադուլը՝ հավատալով մեր վարչապետի խոսքերին և նրա սկզբունքներին: Վստահ ենք, որ հետևողական կլինի մեր բարձրացրած բոլոր հարցերի լուծմանը, քանի որ դրանք չեն պարունակում անձնական շահեր, այլ բխում են մեր ժողովրդի շահերից։ Հավատում և վստահում ենք մեր վարչապետին ու նրա խոսքին։
Պատրաստ ենք մեր ուժերի չափով աջակցել պարոն Փաշինյանին և նրա կառավարությանը։
Շնորհակալ ենք Ձեզ, մեր հարգարժան պարոն Փաշինյան, որ արձագանքեցիք մեր խնդրանքին։
Փա՛ռք մեր վարչապետին, փա՛ռք հայ ժողովրդին, փա՛ռք ազատ, անկախ Հայաստանի։ Աստված պահապան մեզ՝ բոլորիս»։