«Դու ո՞վ ես, որ ես քեզ փաստաթուղթ ցույց տամ»․ «Սասնա Ծռեր»-ի աջակիցները կրկին շրջափակել են դատախազության մուտքը (ֆոտո)
Արդեն մի քանի օր է՝ «Սասնա Ծռեր» խմբի աջակիցները շրջափակել են Գլխավոր դատախազության շենքի մուտքերը։ Նրանք «Ազատություն քաղբանտարկյալներին և «Սասնա Ծռեր»-ին» մակագրությամբ պաստառով պահանջում են դատախազ Արթուր Դավթյանի հրաժարականը։
Դատախազության աշխատակիցները ցուցարարներից պահանջում են բացել մուտքը և հիշեցնում են նորընտիր վարչապետի խոսքը, թե այլևս հարցեր լուծելու համար մուտքեր ու փողոցներ չեն փակվելու։
Չնայած դրան՝ «Սասնա Ծռեր»-ի աջակիցները չեն դադարեցնում ակցիաները։ Այսօր՝ մայիսի 22-ին, հերթական անգամ մուտքը փակելու ժամանակ դատախազության աշխատակիցներից մեկը փորձեց մուտք գործել։ Ցուցարարները նրանից պահանջեցին փաստաթուղթ, ինչը հունից հանեց աշխատակցին։
«Դու ո՞վ ես, որ ես քեզ փաստաթուղթ ցույց տամ»,- ասաց դատախազության Մանվել անունով աշխատակիցը՝ հրելով ցուցարարին։ Նրանց իրարից բաժանեցին հավաքված ոստիկաններն ու մյուս ցուցարարները։
Ցուցարարները նկատեցին, որ վարչապետի ժողովրդական թեկնածուն իրավունք չունի միջամտելու դատախազության գործին, բայց իրենք ունեն այդ իրավունքը․ «Մենք պահանջում ենք դատախազների հրաժարականը և փոխել քաղբանտարկյալների խափանման միջոցը»,- ասացին ակտիվիստները։