Սոցցանցերից ստալինիզմի հոտ է փչում
Նիկոլ Փաշինյանի՝ վարչապետ նշանակվելուց հետո, երկրում բոլորովին էլ հանդուրժողականության մթնոլորտ չի ձևավորվել, այլ հակառակը։ Նախ սոցիալական ցանցերում հիմնականում կեղծ պրոֆիլներն իսկական հարձակում են սկսել նոր կառավարության ցանկացած շարժին ոչ դրական գնահատականի վերաբերյալ։ նաև Սկսվել է նաև, բացի ներկա իշխանությունից, բոլորին ոտնատակ տալու, քննադատելու, անկողինը խցկվելու, ստահոդ լուրեր տարածելու միտումը։
Այս ամենը բոլորովին էլ հանդուրժողականություն չէ, այլ իսկական պատերազմ։
Բացի այդ, դեռևս այստեղ-այնտեղ պլակատներ կան՝ «ազգի դավաճան» կամ նման հայտարարություններ։ Նշենք, որ հիմնականում հենց Ստալինի օրոք էր, որ ազգի դավաճան, երկրի դավաճան տերմինը շրջանառվեց, և Հայաստանից սկսեց դեպի Մոսկվա հոսել բողոքների և մատնությունների այնպիսի մի հսկա քանակություն, որ Հայաստանի բնակչության հաշվով ահռելի թիվ էր։
Ահա ստալինյան ժամանակների իրավիճակը արտացոլվում է նաև այժմ, սակայն հիմնականում սոցիալական ցանցերում, որն այժմ մեծ ծավալներ է ընդգրկում և լայն լսարան ունի։
Բացի այդ, սկսել են անանուն կամ հեղինակով մատնությունները՝ տարբեր ոլորտների տնօրենների, ղեկավարների, մասնագետների, հարևանի, ընկերուհու, նախկին սիրուհու, երգչի կամ ամենատարբեր մարդկանց նկատմամբ․ իսկական մարդաորս։
Հենց սոցցանցերում հորինվում են պատմություններ, ֆոտոշոփի միջոցով մարդկանց նսեմացնում են․ դա արվում է հատուկ նպատակով և հատուկ ուղղվածությամբ։
Չի բացառվում, որ մարդիկ «մեղքեր» ունեն, նաև իրավիճակն է թելադրել մարդկանց ապրել որոշակի կանոններով, անգամ` ներկայիս «հեղափոխականները»։
Իսկ այսօր փորձելով այլոց սևացնել՝ նաև փորձում են իրենց կաշին փրկել։
Իրավիճակը շատ վտանգավոր է, քանի որ մարդկանց մտքում միայն սևացնելու վերաբերյալ մտքերն են, որը հասարակության մեջ որոշակի մտայնություն է ձևավորում՝ ոչ դրական։
Իհարկե, համապատասխան մարմինները, հավանաբար, դժվարությամբ են կողմնորոշվում, քանի որ նոր իրավիճակ է, սակայն սոցիալական ցանցերը շփվելու, տեղեկություններ փոխանակելու կամ կիսվելու հնարավորություն են, ոչ թե վախեցնելու, հայհոյելու, կեղծ պրոֆիներով սպառնալու, նաև զրպարտություններ տարածելու միջոց։
Երևի թե բանալի կա, մնում է խնդրին լուծում տալ, հակառակ դեպքում՝ սոցցանցերի ներկայիս իրավիճակը գնալով սպառնալից է դառնում։