Հյուսիսային պողոտայի «Կաֆե Դե Ֆրանս»-ը հաղթեց բոլորին և բացվեց

Երևանի Հյուսիսային պողոտան շարունակում է լցվել զանազան սրճարաններով, խանութներով, ժամանցային այլ վայրերով, որոնք խանգարում են տեղի բնակիչներին: Նման դեպք գրանցվեց նաև օրեր առաջ, երբ բնակիչները սկսեցին բողոքել նոր բացվող «Կաֆե Դե Ֆրանս»-ի դեմ:

Շինարարությունը կանխելու նպատակով Հյուսիսային պողոտա էր գնացել նաև ավագանու ԵԼՔ խմբակցության անդամ Դավիթ Խաժակյանը, նա դիմում էր քաղաքապետին՝ ժամ առաջ ապօրինությունը կասեցնելու համար:

Սակայն, ինչպես երևում է, ո՛չ դատարանը, ո՛չ քաղաքապետ Տարոն Մարգարյանը, ո՛չ թաղապետ Արա Սադոյանը, ոչ էլ բնակիչները չկարողացան կանխել սրճարանի բացումը:

«Մայրաքաղաքի կենտրոնում վերջին քառակուսի մետրերն են մնացել, որ սրճարան չեն դարձրել: Կար դատարանի որոշում, ըստ որի՝ այս տարածքում իրավաչափ չէ կազմակերպել առևտրային գործունեություն և կազմակերպել մոնտաժային աշխատանքներ: Հիմա ինչ-որ տեղից թույլտվություն են ստացել, նույն էսքիզներով աշխատանքը որը դատարանն արգելել էր՝ բերել-իրականացնում են, բայց արդեն ոստիկանների մասնակցությամբ, որովհետև բնակիչները խոչընդոտում են աշխատանքներին: Ինչ որոշում էլ որ լինի, չի կարող կրկնել այն, ինչը դատարանն իր վճռով արգելել է»,- հայտարարել էր Խաժակյանը: