Նոր սկանդալի կենտրոնում Մեծ Բրիտանիայի վարչապետ Թերեզա Մեյի լուսանկարն է
Օքսֆորդի համալսարանի Սենթ Հյու քոլեջի ղեկավարությունը որոշել է քոլեջի հայտնի շրջանավարտների նկարների միջից հանել վարչապետ Թերեզա Մեյի լուսանկարը:
Լուսանկարը քոլեջի պատին փակցվել էր մի քանի օր առաջ և այդ կարճ ժամանակահատվածում հասցրել էր կոնֆլիկտի պատճառ դառնալ վարչապետի կողմնակիցների և հակառակորդների միջև:
Թերեզա Մեյը Մեծ Բրիտանիայի պատմության մեջ երկրորդ կին վարչապետն է: 1970-ական թվականներին նա Օքսֆորդում աշխարհագրություն էր ուսումնասիրում: Մեյը Սենթ Հյու քոլեջն ավարտած ամենահայտնի քաղաքական գործիչն է, այս քոլեջում է սովորել նաև խաղաղության Նոբելյան մրցանակակիր Աուն Սան Սու Չժին:
Քոլեջի ղեկավարության խոսքերով՝ վարչապետ Մեյի նկարը փակցվել էր այն նպատակով, որպեսզի դա նպաստի իգական սեռի ուսանողների հետաքրքրվածությանը՝ աշխարհագրություն ուսումնասիրելու մեջ: Սակայն նկարը հակառակ ազդեցությունն է ունեցել և ղեկավարությունը որոշել է այն հանել՝ հետագա խնդիրներից խուսափելու համար: