Այս մրցաշրջանի 3 ամենաձախողված տրանսֆերները (ֆոտո)
Չնայած այն բանին, որ ավարտվում է այս մրցաշրջանը, այնուամենայնիվ կարելի է արձանագրել, որ մրցաշրջանը մի փոքր տարբերվում էր նախորդ տարիների մրցաշրջաններից։ Նախ մինչ մրցաշրջանի սկսվելը տրանսֆերային շուկայում մեծ «պայթյուններ» էր անում ֆրանսիական «ՊՍԺ»-ն, ու բոլորը հավատում էին, որ մրցաշրջանը նրանցը կլինի, սակայն․․․
NEWSPRESS.am Sport-ը ներկայացնում է 3 տրանսֆերները, որոնք ձախողված էին։
1․ Նեյմար․ Բարսելոնայից դեպի ֆրանսիական «ՊՍԺ»
Միգուցե շատերը չհամաձայնվեն, որ Նեյմարի տեղափոխությունը այս տարվա վատագույն տրանսֆերներից էր, այնուամենայնիվ պետք է հստակ ընդգծել, որ Ֆրանսիայի ոչ այդքան ուժեղ առաջնությունում Նեյմարը չփայլեց այնպես, ինչպես դա անում էր «Բարսելոնայում»։ Նեյմարը ֆրանսիական թիմերի պաշտպանների հետ անում էր այն, ինչ ցանկանում էր, սակայն Նեյմարը չկարողացավ իրեն դրսևորել եվրոպական թոփ ակումբների պաշտպանների հետ դիմակայությունում։ Նեյմարն իրեն մի փոքր արժեզրկեց վերջին շրջանում, երբ սկսեց բոլորին ցուցադրել իր կամակորությունները։ Արդեն հիմա հստակ խոսվում է, որ բրազիլացին ամենայն հավանականությամբ կգա Մադրիդի «Ռեալ» ու փաստացի փարիզյան ակումբում նրա անցկացրած մեկ տարին դառնում է անիմաստ։ Եթե տեսնենք գոլերի ու ցուցանիշի առումով, ապա Նեյմարն իրոք հաջողված տրանսֆեր էր, սակայն մյուս կողմից նրանք Ֆրանսիայում չեմպիոնություն վաստակում էին առանց Նեյմարի։ Նեյմարը եկել էր Փարիզ, որ հաղթի Չեմպիոնների լիգան ու «Ոսկե գնդակը», բայց փաստացի նա իրեն մեկ տարով հետ գցեց եվրոպական թոփ ֆուտբոլիստների մրցավազքից։ Այդ տրանսֆերի ամենահիշարժան կողմը Նեյմարի տրանսֆերային արժեքն ու աստղաբաշխական աշխատավարձն էր։
2․ Կիլիան Մբապպե․ Մոնակոյից դեպի «ՊՍԺ»
Երբ նախորդ մրցաշրջանում բոլորը խոսում էին նորահայտ աստղերի մասին, ֆուտբոլային աշխարհը հստակ գիտակցում էր, որ «Մոնակոյի» երիտասարդ հարձակվող Կիլիան Մբապպեն առաջիկայում կդառնա եվրոպական ֆուտբոլի թոփ հարձակվողներից։ Այդ մասին վաղ է խոսել, քանի որ ֆուտբոլում չկան «եթե»-ներ ու կան միայն փաստեր։ Արդյունքում վարձակալությամբ, իսկ ապագայում՝ տրանսֆերի գնմամբ, Մբապպեն կլինի «ՊՍԺ»-ի ֆուտբոլիստ։ Այստեղ փարիզյան ակումբի գումարները, մեղմ ասած, «փչացրին» Մբապպեին, քանի որ նա նույնպես գրանցեց գոլեր, գոլային փոխանցումներ, սակայն ֆուտբոլային աշխարհը լռեց խոսել այս տղայի մասին։ Լռեց, քանի որ Մոնակոյում Կիլիանը խաղում էր ավելի լավ, խաղում էր մեծ ու ուժեղ թիմերի դեմ, խաղում էր իր երիտասարդական եռանդով ու գրանցում էր խաղամակարդակի աճ, սակայն փարիզյան փողերը մեկ տարով հետ գցեցին ու մոռացության մատնեցին Մբապպեին։ Այսպիսի օրինակները շատ են, երբ գումարներն ու ժամանակակից առաջ ընկած շնորհավորանքները փչացնում են երիտասարդ ֆուտբոլիստին։ Այս մասին կարելի է նշել նաև Ուսման Դեմբելեի պարագայում։
3․ Ուսման Դեմբելե․ Դորտմունդի «Բորուսիայից» դեպի «Բարսելոնա»
Ուսման Դեմբելեի տրանսֆերն աղմկահարույց էր, քանի որ ֆուտբոլային մի շարք մասնագետներ նշում էին, որ չարժե երիտասարդ ֆուտբոլիստի համար տալ 100 միլիոն եվրո ու ավելի գումար այն դեպքում, երբ նա լավ է խաղացել միայն մեկ մրցաշրջան։ Այստեղ հակասություններ կան, քանի որ թե՛ Նեյմարը, և թե՛ Դեմբելեն վնասվածքներ ստացան ու բաց թողեցին մրցաշրջանի մի երկար ժամանակահատված, սակայն նրանք ձախողեցին նաև այն ժամանակահատվածը, երբ վնասվածք չունեին ու խաղում էին։
Դեմբելեն ևս աղմուկների կենտրոնում կանգնեց տրանսֆերի իրականացման ժամանակ, հետո նաև վնասվածքի ժամանակ ու դրանից հետո։ Դժվար թե մեկ մարդ հիշի, որ 2017/2018 մրցաշրջանում «Բարսելոնայում» կար Դեմբելեի նման ֆուտբոլիստ, սակայն փաստացի այս տղան եղել է այս թիմում։ Դեմբելեի մասին ոչինչ չենք կարող ասել, քանի որ հույսերը մեծ էին, տրանսֆերային արժեքն ու աշխատավարձը բարձր, սակայն արդյունքը՝ 0։ Դեմբելեն չարեց ոչինչ իր ակումբի ու անգամ իր համար։ Մնում է միայն սպասել ու տեսնել, թե այս տղան ի՞նչ կարող է անել հաջորդ մրցաշրջանում, սակայն արդեն հիմա հստակ ասում են, որ ամառային տրանսֆերային պատուհանի ժամանակ «Բարսելոնան» վաճառքի կհանի Դեմբելեին։