Հեղափոխության հաջորդ կանգառը Երևանի քաղաքապետարանն է
Հեղափոխական ոգին Հայաստանում արթնացել ու այդպես էլ չի հանդարտվում: Սերժ Սարգսյանի հրաժարականից հետո, ոգևորված հանրույթը որոշել է այլևս չընկրկել և պայքարի դուրս գալ իրեն ճնշող ուժերի դեմ:
Մարդիկ այս օրերին ոգևորված են, հավատում են իրենց ուժերին և ստիպում են պաշտոնյաներին ենթարկվել իրենց, չէ՞ որ իրենց տված հարկերից է գոյանում այդ պաշտոնյայի աշխատավարձը, ծառայողական մեքենան և այլն...:
Այսպես, Սարգսյանին ցտեսություն ասելուց հետո, սկսվեց պայքարն արդեն ցածր կալիբրի, բայց վնասատու ուժերի դեմ: Ընդամենը երկօրյա դասադուլի և բողոքի ակցիաների արդյունքում աշխատանքից ազատման դիմում ներկայացրեց Ռուզաննա Ազիզյանը՝ թիվ 11 դպրոցի տնօրենը, ով Սերժ Սարգսյանի համակուրսեցին է, և այն նույն մարդը, ով 2013 թվականի նախագահական քարոզարշավի ժամանակ «կրակոտ երիտասարդ» անվանեց իր համակուրսեցուն:
Վստահաբար, հաջորդ հրաժարականը ՇՊՀ ռեկտորինն է, քանի որ այսօր բազմաթիվ քաղաքացիներ պահանջում են նրա հրաժարականը, եթե Սարգսյանը չդիմացավ, Մինասյանը ո՞նց կդիմանա:
Ըստ իրադարձությունների զարգացման՝ կարող ենք նկատել, որ ուժերը կենտրոնացվում են այնտեղ, որտեղ ընդդիմադիր հատվածը ներկայություն ունի, իսկ այդպիսի ծանրակշիռ ներկայություն ունի նաև Երևանի քաղաքապետարանում, և սա մեզ թույլ տալիս ենթադրելու, որ բավականին երերուն է Տարոն Մարգարյանի թանկարժեք բազկաթոռը, և կարճ ժամանակ է պետք, որպեսզի քննարկվի Մարգարյանի կարիերայի ավարտը:
Նկատենք, որ այս պաշտոնյայի մոտ երկվություն կարծես լինի. մարդկանց մի մասն ընդունում է նրան, մյուսը ̀ ոչ: Հարցն այն է, որ միլիոնավոր գումարներ է Տարոն Մարգարյանն ամեն ամիս ծախսում իր վարկանիշի բարձրացման համար, ստիպում իր աշխատողներին իրեն գովերգող տողեր ձոնել, ինչն էլ, բնականաբար, որոշ ազդեցություն ունենում է մարդկանց ընկալումներում: Այդ ամենից տեղյակ մարդիկ Մարգարյանին ընդունել չեն կարող, իսկ ահա լավատեղյակ «Ելք»-ականները պարզապես չեն կարող հաշտվել նրա քաղաքապետության հետ:
Եվ հետևաբար, հեղափոխության հաջորդ կանգառը Երևանի քաղաքապետարանն է: