Մայիսի 8-ին Հայաստանը կունենա վարչապետ. Վահրամ Բաղդասարյանը հրապարակեց ՀՀԿ-ի որոշումը
Ազգային ժողովի Հայաստանի Հանրապետական խմբակցության նիստից հետո խմբակցության ղեկավար Վահրամ Բաղադսարյանը հանդես է եկել հայտարարությամբ՝ տեղեկացնելով, որ մայիսի 8-ին Հայաստանը կունենա սահմանադրական ճանապարհով ընտրված վարչապետ: Ընդ որում՝ իրենց խմբակցությունը վարչապետի թեկնածու չի առաջադրի: Հայտարարության մեջ, մասնավորապես, ասված է.
«Մենք դրական ենք գնահատում փաստը, որ Ազգային ժողովի քննարկումներում խորհրդարանական 4 խմբակցությունների կողմից հնչեցին առկա գրեթե բոլոր մտահոգությունները, որոնք կան երկրում՝ ստեղծված իրավիճակը հանգուցալուծելու տեսանկյունից: Հանրապետականի կողմից հնչեցված մտահոգությունների մի մասը վարչապետի թեկնածուի հետ հարցուպատասխանի ընթացքում փարատվեց, բայց ամենակարևորները դեռ մնացել ենանպատասխան: Այդ հարցերն անկյունաքարային են ոչ թե Հանրապետական կուսակցության, այլ մեր երկրի հենց վաղվա համար:
Հանրպետականը լուռ ու անխնա իր վրա վերցրեց մեղադրանքները, որոնք իր հետ իրականում քիչ կապ ունեին, վերցրեց հանուն երկրի, հանուն վաղվա՝ հույսով, որ ովքեր պետք է ընկալեին, ընկալեցին մեր ասելիքը: Այժմ հաշվի առնելով երկիրն անհապաղ կայունացնելու հրամանայականը, ի գիտությունուն ընդունելով սույն թվականի մայիսի 1-ին ՀՀ ԱԺ վարչապետի ընտրության գործում հնչած դիրքորոշումներն ու քվեարկության արդյունքները՝ ՀՀԿ խմբակցության անունից հայտարարում եմ՝
Հայաստանի Հանրապետությունը մայիսի 8-ին ունենալու է սահմանադրական ճանապարհով ընտրված վարչապետ:
Հայաստանի հանրապետական կուսակցությունը վարչապետի թեկնածու չի առաջադրելու,
ՀՀԿ-ն խորհրդարանի 1/3-րդի կողմից առաջադրված թեկնածուին աջակցելու է դառնալ վարչապետ:
Կոչ ենք անում անհապաղ վերացնել տիրող անընդունելի վիճակը, բացել մայրաքաղաքի ու Հանրապետության մայրուղիները, շտապ դադարեցնել օդանավակայանի հերթական շրջափակումը, դադարեցնել անհանդուրժողականության քարոզը և վերադառնալ սահմանադրական ճանապարհով ենթադրվող անհրաժեշտ գործողությունների դաշտ»,- ասված էր հայտարարության մեջ