Հանրապետականն այրեց բոլոր կամուրջները
Նախօրեին Ազգային ժողովը չընտրեց վարչապետ, դա երևի սպասելի էր, քանի որ ՀՀԿ-ն հենց այնպես չէր հանձնվի՝ պարզապես բոլոր խաղաքարտերը տալով ընդդիմադիր ուժին։ Այլ հարց է, թե ով ինչպես է առաջնորդվում կամ ինչ ուժեր են կանգնած թե՛ Հանրապետականի և թե՛ Նիկոլ Փաշինյանի հետևում։ Նիկոլն առավելություն ունի միայն նրանով, որ կարողացավ ձևավորել ազգային անհնազանդության քայլ, որը որևէ մեկ այլ գործչի չի հաջողվել։
Հանրապետականների ելույթները նախապես գրված-պատրաստված էին, ինչն ապացուցում է, որ նախօրոք հրահանգ էր տրված, թե ինչպես է վարվելու ՀՀԿ-ն։ Ակնհայտ էր, որ նախօրեին Ազգային ժողովի ՀՀԿ խմբակցությունը Նիկոլ Փաշինյանի հետ հանդիպումից հետո ուշքի էր եկել և ելույթների նոտաներն արդեն ուրիշ էին։
Լսելով ազգընտիրներին, հանրության այն հատվածը, որը ոչ կողմ էր, ոչ դեմ Հանրապետականին կամ ծավալվող իարդարձություններին, մտափոխվեց։
Իհարկե, կային պատգամավորներ, ովքեր զգուշացրին, որ Հանրապետականը կրակի հետ է խաղում, սակայն պատգամավորները ևս մի քանի օրով երկարաձգեցին Ազգային ժողովի հոգևարքը։
Այսօր արդեն տոտալ գործադուլ, դասադուլ և անհնազանդություն է սկսվել: Եթե Սերժ Սարգսյանը հրաժարական տվեց ավելի քիչ դասադուլի, գործադուլի և անհնազանդության պայմաններում, ապա Ազգային ժողովին սպասվում է ավելի մեծաքանակ անհնազանդություն և գործադուլ։
Եթե ԱԺ-ն հնարավորություն ուներ գոնե փրկելու դեմքը և փողոցում հայրենակիցների հետ հանդիպելու դեպքում չամաչելու նայել նրանց աչքերին՝ նախօրեն ապացուցեց, որ մտածում են միայն պահի մասին, իսկ հետոյի մասին՝ ոչ։
Թե չէ, կարող էին ենթադրել, որ վարչապետ չընտրելու պարագայում անհնազանդությունը շարունակվելու է, իսկ դասադուլն ու գործադուլը՝ ավելանալու։ Ազգընտիր ԱԺ-ն, իր անհեռատեսությամբ, տանում է երկիրը կազմաքանդման՝ կառչած սեփական նեղմտությանը։
Այս սցենարով՝ ԱԺ-ն ևս, ինչպես Սերժ Սարգսյանը, հեռանալու են քաղաքական ասպարեզից, իսկ պատգամավորների մեծամասնության վերընտրությունը խիստ կասկածելի է։
Եվս մեկ օր մնալ պատգամավոր, երկարացնել ԱԺ-ի հոգևարքը՝ քաղաքական կարճմտության արդյունք է, որով պատգամավորները իրավամբ կարող են հպարտանալ։