Երևան-Գառնի տրանսպորտային երթուղին չի աշխատում. Մարդիկ պարապուրդի են մատնված
Երևան-Գառնի տրանսպորտը չի աշխատում՝ արդեն երկու օր է: Այս մասին NEWSPRESS.am-ին տեղեկացրին Գառնի համայնքի բնակիչները:
Նրանք նշում էին, որ չեն կարողանում ո՛չ Երևան գնալ, ո՛չ աշխատանքի, ո՛չ սովորելու:
Ի դեպ, արդեն քանի տարի է` գործում է Երևան-Գառնի ուսանողական անվճար ավտոբուսը, որն արդեն մեկ շաբաթ է` չի աշխատում, և անգամ ուսանողները հնարավորություն չունեն դասի գնալու:
Կարճ ասած՝ Երևան-Գառնի տրանսպորտային ուղին կաթվածահար է:
Երբ NEWSPRESS.am-ը փորձեց կապ հաստատել Երևան-Գառնի տրանսպորտային երթուղին շահագործող ընկերությունների հետ, հեռախոսազանգերը մնացին անպատասխան:
Նշենք, որ ոչ միայն չի աշխատում կամ վատ է աշխատում Երևան-Գառնի տրանսպորտային երթուղին, այլև այլ մարզերի տրանսպորտը ևս:
Նման իրավիճակ լինում է, սովորաբար, գրեթե բոլոր ընտրությունների ժամանակ, երբ ավտոբուսներն օգտագործում են ոստիկաններ տեղափոխելու համար, իսկ տրանսպորտային գիծը պարզապես չեն աշխատեցնում՝ մարդկանց տեղաշարժը սահմանափակելու համար: Իսկ մարդկանց ազատ տեղաշարժն ապահովելն ամրագրված է Սահմանադրությամբ, այն նույն Սահմանադրությամբ, որը իշխանության բերեց Սերժ Սարգսյանին: