Սեփական հաշիվների մաքրո՞ւմ, թե՞ արդար դատ․ իրականում կա՞ր 11 մետրանոց, թե՞ ոչ․ NEWSPRESS.am Sport-ի տեսակետը
Սպորտային մամուլում, Իսպանիայում, Իտալիայում, Հայաստանում, փողոցներում ու ֆեյսբուքում շարունակվում են քննարկումներն այն մասին, թե արդյոք խախտե՞ց կանոնները Մեհդի Բենատիան Լուկաս Վասկեսի դեմ պայքարում, թե՞ ոչ։
Խախտումը տեղի ունեցավ հանդիպման ավելացված ժամանակի վերջին վայրկյաններին։ Լուկաս Վասկեսից բացի՝ ուրիշ ոչ ոք հստակ չի կարող պատասխանել այն հարցին, թե արդյո՞ք Բենատիայի ձեռքն այնքան ուժեղ դիպավ Վասկեսի մեջքին, որ իսպանացին չդիմացավ ու ընկավ գետնին, թե՞ այդ պահին այդպես էր պետք։ Ֆուտբոլն այնպիսի սպորտաձև է, որտեղ մարզիկներն իրար հպվում են, իրար դեմ ուժային պայքար ծավալում։
Այն, որ Բենատիան հպվեց՝ փաստ է ու երևում է նաև տեսանյութում, սակայն ամեն հպում չէ, որ կարող է լինել կանոնների խախտում։ Բենատին ձեռքը դրել էր Վասկեսի մեջքին, սակայն նա ոտքով առաջինը հասավ գնդակին։
Կար հպում, գնդակին առաջինը հասավ Բենատիան, սակայն արդյունքում եղավ 11 մետրանոց հարված։ Մյուս կողմից՝ պետք էր նաև մրցավարական «քթածակ», քանի որ Մայքլ Օլիվերը հստակ տեսավ, որ երկու թիմերն էլ նախապատրաստվել են լրացուցիչ ժամանակի համար ու այս խախտումն այնպիսի կոպիտ ու հստակ խախտում չէր, որ կարելի էր անտեսել ամեն ինչ, նշանակել այդ հարվածն ու Բուֆֆոնին էլ հեռացնել։
Խախտումը հարցի առաջին մասն է, որը վիճելի է, սակայն այդ փոքրիկ հպումը արժանի չէր 11 մետրանոց հարվածի։ Իսկ հարցի 2-րդ կողմը Բուֆֆոնի հեռացումն էր, որն իրոք անտեղի էր։ Բուֆֆոնը բղավեց մրցավարի վրա, հարձակվեց, սակայն մի՞թե կարելի էր այդպիսի էմոցիոնալ պահին, այդպիսի պատասխանատու պահին հեռացնել մի մարդու, ով 11 մետրանոցներ հետ մղելու արքան է։ Միգուցե մրցավարը վիրավորվեց Բուֆֆոնից, ու սեփական վիրավորանքը քողարկելու համար այդ քարտը ցույց տվեց, սակայն նա այդկերպ ամեն ինչ լիարժեք բարդեց իր վրա։ Ստացվեց այնպես, որ սեփական հաշիվները մաքրելու համար մրցավարը հաղթանակ պարգևեց «Ռեալ»-ին։ Իսկ այն հարցին, թե ի՞նչ կլիներ Բուֆֆոնի կարմիր քարտի բացակայության դեպքում, չի կարող պատասխանել ոչ ոք։
Փաստացի, 2-րդ տարին անընդմեջ, Չեմպիոնների լիգայի ամենապատասխանատու հանդիպման ժամանակ, մրցավարական սխալը (հիշենք, թե ինչպես նախորդ մրցաշրջանում Ռոնալդուն գրավեց «Բավարիա»-ի դարպասը խաղից դուրս վիճակում) ճակատագրական է դառնում թիմերից մեկի համար։
Մրցավարական սխալի արդյունքում հաջորդ փուլ անցավ «Ռեալ»-ը։ Մրցավարական սխալի ադրյունքում Բուֆֆոնը կարմիր քարտ ստացավ, չկարողացավ լիարժեք խաղալ իր խաղը Չեմպիոնների լիգայի՝ իր վերջին խաղարկության ժամանակ, չկարողացավ օգնել իր թիմին 11 մետրանոց հարվածի ժամանակ։
Սա ֆուտբոլային անարդարության վերջին կաթիլն էր, որն էլ հավանաբար ամեն ինչ կտանի նրան, որ հաջորդ մրցաշրջանում լինեն տեսակրկնություններն ու չլինեն այսպիսի խայտառակություններ։
Իսկ ֆուտբոլային աշխարհը երազում է, որ Բուֆֆոնը կհայտարարի այն մասին, որ մեկ տարի ևս կխաղա «Յուվենթուս»-ի կազմում։