«Շեֆ, առաջադրանքը կատարված է, մուտքն ազատ է․․․»․ Դավիթ Հարությունյանը գոհացրեց Սերժ Սարգսյանին ու օրհնվեց գործադիրի կողմից
ՀՀ արդարադատության նախարար Դավիթ Հարությունյանը գոհ է, որ կառավարության նիստերն այսուհետ լրագրողների համար փակ են լինելու։ Նա կառավարության նիստից հետո լրագրողների հետ զրույցում ասել է, թե ինքը չի փոշմանել նման որոշման համար։
«Ընդհանրապես որևէ քայլ, որ կատարում եմ, ես գիտակցում եմ, որ կարող եմ արժանանալ քննադատության, այնուամենայնիվ, փորձում եմ անել այն, ինչը, իմ կարծիքով, կօգնի, որ քննարկումները լինեն ավելի խոր, ավելի բովանդակալից, արդյունքում ավելի որակյալ որոշումներ ընդունվեն»։
Թե իրականում ինչ նկատի ունի Դավիթ Հարությունյանը «բովանդակալից ու խոր քննարկումներ» ասելով՝ հայտնի են իրեն և ՀՀԿ «բարձրյալին», ում հրահանգով էլ թերևս այսուհետ լրագրողները հնարավորություն չեն ունենա հետևել նիստերին ու տեսնել, թե ինչպես են գործադիր մարմնի ղեկավարները «չորանում» նույն այդ «բարձրյալի» նսեմացնող հայացքից ու խոսքերից։
Այս առումով կառավարության համար թերևս տեղին էր փակել նիստերը, քանի որ Սերժ Սարգսյանը` որպես վարչապետ, հազիվ թե գործադիր մարմնի ներկայացուցիչների հետ շփվի ի պաշտոնե, և հավանաբար, շատ կլինեն նաև դիտողություններ։ Ու նախարարությունների ղեկավարները, փաստորեն, ծպտուն չէին կարող հանել վարչապետի առաջ ու մուննաթ գալով՝ լեզվակռվի մեջ մտնել Սերժ Սարգսյանի հետ, ինչպես մյուս վարչապետների օրոք էր լինում։ Բայց, որ կարող էր իրենց համար ավելի սարսափելի լինել, նրանց նվաստացումը հանրայնացվելու էր, դառնար քննարկման թեմա և գուցե նաև ի չարս օգտագործվեր իրենց իսկ դեմ։
Դա մի կողմից։ Մյուս կողմից էլ՝ հաշվի առնելով, որ Սերժ Սարգսյանը հանրային ղեկավար չէ, ուստի պետք էր նման բան սպասել։ Նա միշտ էլ խուսափում է բաց բանավեճերից, քննարկումներից ու հատկապես ԶԼՄ-ների հետ ճակատ առ ճակատ հանդիպումից։ Լրագրողները պետք է հետևեն նրա ձայնային տոնայնությանը, ելևէջներին, դեմքի միմիկաներին, ժեստերին՝ հրապարակելով այդ ամենը։ Դա Սարգսյանին հաստատ պետք չէր։
Ու հիմա կլինի այնպես, ինչպես «հին ու բարի օրերում»։
Լրագրողները կնստեն, գուցե միմյանց հետ մտքեր փոխանակելով ու զրուցելով՝ կսպասեն, թե ում է այդ օրը կառավարությունը «գործուղելու» ներքև՝ պատասխանելու իրենց հարցերին։
Այսինքն՝ սա կլինի կառավարության հետքայլը, որից մի քանի տարի առաջ անցում կատարեց և սկսեց իրեն ավելի ցիվիլ դրսևորել։
Ու թքած, թե այս ամենը հետքայլ է կամ վերադարձ է նախորդին․ կարևորը, որ այս վիճակը գոհացնում է երկրի այսօրվա ղեկավարին, ով կլինի նաև վաղվա ղեկավարը, գոհացնում է նրան հնազանդվողներին, ովքեր չեն կաշկանդվի լրագրողների տեսախցիկներից ու հանգիստ կընդունեն իրենց ուղղված լուտանքները, և իհարկե գոհացնում է նաև Դավիթ Հարությունյանին, որովհետև իրեն հաջողվել է գոհացնել Սերժ Սարգսյանին ու «օրհնվել» գործադիրի կողմից։ Ու հիմա կարող է հանգիստ զանգել ու զեկուցել․ «Շեֆ, առաջադրանքը կատարված է, մուտքն ազատ է․․․»: