Պոնչոն, փող հավաքողն ու վարչապետի հոգեզավակը. նախարարներ, որ պետք է հեռանան. մաս 3
Մենք շարունակում ենք ներկայացնել այն նախարարների ցանկը, որոնք օր առաջ պետք է պաշտոնանկ արվեն և հեռացվեն պետական համակարգից:
Այս անգամ մեր ցանկում առաջին հորիզոնականը զբաղեցնում է Հայաստանի պատմության, կարելի է ասել՝ Հայոց պատմության բոլոր ժամանակների ամենախայտառակ Արտաքին գործոց նախարարը: Խոսքն Էդվարդ Նալբանդյանի մասին է:
Նա տասը տարի է, ինչ ղեկավարում է հայկական արտաքին գերատեսչությունը, և տասը տարի շարունակ Հայաստանը կամաց կամաց-կորցրել է իր սուվերենությունը՝ հասնելով ողբալի մակարդակի:
Էդվարդ Նալբանդյանի՝ 10 տարվա գրանցած հակառեկորդին կանդրադառնանք հակիրճ՝ ներկայացնելով ամենախայտառակները:
Նալբանդյանի առաջին ֆիասկոն հայ-թուրքական ձախողված արձանագրություններն էին, որոնք, ի բարեբախտություն մեզ, այդպես էլ կյանքի չկոչվեցին: Նալբանդյանն էր «առանց նախապայմանների» հարաբերություններ ստեղծողը: Սա նրա առաջին խայտառակությունն ու չստացված համաձայնագիրն էր:
Պոնչո նախարարը թուրքական բանակցություններից հետո նախաձեռնեց Եվրամիության հետ բանակցություններ: 4 տարի բանակցելուց հետո, Հայաստանը մեկ գիշերում անդամակցեց ԵԱՏՄ-ին: Մենք մտանք Մաքսային միություն, և Նալբանդյանի 4 տարվա կատարած աշխատանքը զրոյացավ: Սա նրա երկրորդ լուրջ խայտառակությունն էր:
Էդվարդ Նալբանդյանի ամենակարևոր բացթողումն այն է, որ Հայաստանը՝ որպես սուվերեն երկիր, գնալով նվաստանում է: Ավելի ճիշտ կլինի ասել՝ Նալբանդյանի «ջանքերի» շնորհիվ Հայաստանը կորցրել է իր սուվերենությունն ու դարձել Ռուսաստանի ԱԳՆ-ի հայկական վարչություն: Էդվարդ Նալբանդյանը 10 տարվա ընթացքում այդպես էլ չառաջնորդվեց մեր պետական շահով, այլ միայն ու միայն Լավրովի սցենարով:
Մեզ անհրաժեշտ է նպատակասլաց, ավելի խելացի և, անկեղծ ասած, մի քիչ էլ «դուխով» ԱԳ նախարար, որ ոչ ոք նրա թուշիկներին պոնչո չանի: Ի դեպ, Նալբանդյանը հավակնում է դառնալ Հայաստանի ամենաերկարակյաց պաշտոնյաներից մեկը:
ԿԱՐԴԱՑԵՔ ՆԱԵՎ՝ Ինչո՞ւ պետք է հեռացվեն այս երեք նախարարները
Ցուցակի հաջորդ հորիզոնականում է ՀՀ պաշտպանության նախարար Վիգեն Սարգսյանը:
Թե ինչու Վիգեն Սարգսյանը չպետք է լինի Պաշտպանության նախարար, կա ընդամենը մեկ պարզ բացատրություն՝ Վիգեն Սարգսյանը բանակում անգամ չի ծառայել, նրանից ի՞նչ նախարար:
Բայց դա միայն սկիզբն է: Վիգեն Սարգսյանն այնքան է նվաստացել, որ Ֆեյսբուքում կոչ է անում դրամահավաք կազմակերպել և վիրավոր զինծառայողին բուժել արտասահմանում: Իսկ երբ քաղաքացին նրա այդ քայլն արդարացիորեն որակում է՝ «բոշայություն», Հայաստանի՝ պատերազմող Հայաստանի պաշտպանության նախարարը ՀՀ քաղաքացուն պատասխանում է. «Բոշան դու ես»:
Միայն այսպիսի պահվածքի համար Վիգեն Սարգսյանը րոպե շուտ պետք է հեռացվեր Հայաստանի ամենակարևոր ուժային գերատեսչության ղեկավարի պաշտոնից: Վիգեն Սարգսյանը կյանքում ախր զենք չի բռնել, նրան ինչպե՞ս կարելի է պատերազմող երկրի բանակ վստահել: Նրա պաշտոնավարման օրոք ականատես ենք եղել միայն ու միայն պրոֆեսիոնալ կադրերի հեռացման ու ճոռոմ-ճոռոմ ելույթների:
Չմոռանանք, որ հենց Վիգեն Սարգսյանն ամբողջ երկրին դրեց «1000 դրամանոց» պարտքի տակ, որպեսզի փոխհատուցվեն զոհված կամ վիրավորված զինծառայողների ընտանիքները:
Հարց է առաջանում՝ պատերազմ սկսելու դեպքում, ո՞վ կլքի խրամատն առաջինը: Պատասխանը պարզ է՝ բանակում չծառայած, 1000 դրամ հավաքողը: Հայաստանի Հանրապետության պաշտպանության նախարարը պետք է լինի այնպիսի մեկը, որը երբեք չի խորշի թշնամուց և հարձակման հրաման տալուց:
ԿԱՐԴԱՑԵՔ ՆԱԵՎ՝ Պաշտոնանկության ենթակա նախարարների ցանկ. Մաս 2
Կառավարության խայտառակ նախարարներից է նաև բարեփոխիչ Կարեն Կարապետյանի հաջորդ հոգեզավակը՝ Տրանսպորտի, կապի և տեղեկատվական տեխնոլոգիաների տեխնոկրատ նախարարը, ում գալուց հետո սկսեց վատանալ թե՛ կապի որակը, թե՛ տրանսպորտի:
Հիմա սկսենք ամենաաղմկոտ դեպքերից: Նախարար Վահան Մարտիրոսյանը (չշփոթել ազգի դավաճանի հետ) գցեց-բռնեց, որ Հայաստանում աջ ղեկով մեքենա վարելը վտանգավոր է և առաջացնում է պատահարներ: Նախարարը չամաչեց ու խաբեց ժողովրդին՝ ասելով, որ ավտովթարների մեծ մասը լինում են հենց աջ ղեկով մեքենաների պատճառով: Մինչ Վահան Մարտիրոսյանն առանց աչք թարթելու ստում էր, ոստիկանությունը շտապեց հերքել: Ըստ ոստիկանության՝ նման վիճակագրություն չկա, որ աջ ղեկով մեքենաներն են վթարի պատճառը:
Բայց քանի որ Վահան Մարտիրոսյանը փողն ամենից շատ է սիրում, հասավ նրան, որ ապրիլի մեկից աջ ղեկով մեքենաները Հայաստան չեն ներմուծվի:
Վահան Մարտիրոսյանը, որը նաև «Ռոստելեկոմի» սեփականատերերից մեկն է, իր պաշտոնից օգտվելով՝ այնպես արեց, որ կապի մյուս օպերատորները շարժական անսահմանափակ ինտերնետ չվաճառեն: Մարդն օլիգարխի դասական նմուշ է, կարելի է ասել՝ կենդանի դասական: Ամեն ինչ շատ ավելի պարզ է, քան թվում է առաջին հայացքից: Քանի որ Վահան Մարտիրոսյանի «Ռոստելեկոմը» Wi-Fi ցրիչներով կամ «ֆլեշկաներով» ինտերնետ ծառայություն չի մատուցում, այնպես արեց, որ մյուս օպերատորներն էլ չկարողանան մատուցել:
Ամեն ինչ թղթով է, ամեն ինչ օրենքով է:
Վահան Մարտիրոսյանն այնքան քստմնելի է դարձել, որ օրենքի նախագիծ էր բերել ԱԺ, որի համաձայն՝ այսուհետ պետք է տուգանվեն ճանապարհներին միրգ կամ այլ մթերքներ վաճառող քաղաքացիները: Փառք Աստծո, ԱԺ-ում այդքան էլ հիմար չեն, և այդ օրենքը հետ ուղարկեցին, որ Վահան Մարտիրոսյանը մտցնի… աղբամանը:
Այսքանից հետո ցանկություն չկա նաև հիշել, որ այս նախարարի օրոք էլ շարունակում է խայտառակ վիճակում մնալ մարզային տրանսպորտի հարցը:
Իսկ Հյուսիս-Հարավի մասին ավելի լավ է լռենք:
Արիանա Հովսեփյան
NEWSPRESS.am-ի հիմնադիր-տնօրեն