Բենիամին Նեթանյահուն կասեցրել է ՄԱԿ-ի հետ կնքած համաձայնագիրն՝ այն կնքելուց ժամեր անց
Իսրայելի վարչապետ Բենիամին Նեթանյահուն կասեցրել է ՄԱԿ-ի՝ փախստականների հարցերով հանձնաժողովի հետ կնքած համաձայնագիրն՝ այն կնքելուց ժամեր անց: Ըստ այդ համաձայնագրի՝ աֆրիկացի փախստականների մի մասին Իսրայելը կացության թույլտվություն պետք է տար:
Համաձայնագրի կասեցման մասին Նեթանյահուն հայտնել է facebook-յան իր էջի միջոցով: Նրա խոսքերով՝ ինքը հանդիպել է Թել-Ավիվի հյուսիսային հատվածի (այնտեղ են բնակվում աֆրիկացի փախստականների զգալի մասը) ներկայացուցիչների հետ և որոշում կայացրել: Ձեռք բերված համաձայնությամբ, Իսրայելում գտնվող շուրջ 16 հազար փախստականների մի մասին կընդունեն Իտալիան, Գերմանիան, Կանադան, իսկ մյուս մասին` Իսրայելը պարտավորվում էր կացության թույլտվություն տալ:
Ավելի վաղ Իսրայելի գերագույն դատարանը որոշում էր կայացրել երկրի տարածքում անօրինական գտնվողներին արտաքսել Իսրայելից, սակայն գործընթացը դադարեցվեց: Մինչ 2014 թվականը, երբ Իսրայելը սահմանափակող պատնեշ կառուցեց Եգիպտոսի սահմանին, երկիր էր ներթափանցել մոտավորապես 60 հազար փախստական՝ աֆրիկյան տարբեր երկրներից: Պատնեշի կառուցումը նվազեցրեց և ի վերջո զրոյի հասցրեց փախստականների մուտքը՝ Իսրայել: