Տարոն Մարգարյանը թանկարժեք կոշիկները հագել էր, որ ծառ տնկի՞, թե՞ նկարվի
Շաբաթ օրը ծառատունկ էր. մեծ ու փոքր հավաքվել էին Երևանում՝ ականատես լինելու, թե ինչպես է Տարոն Մարգարյանը ծառ տնկում` կտրելու փոխարեն: Իրոք որ, արածը քաջագործություն էր և իհարկե արժանի էր նկարահանվելու: Տարածքում ավելի շատ տեսախցիկ կար, քան ծառ տնկող կամ հենց ծառ: Եղած-չեղած մեկ ծառի երջանկությունը կոչվում է «տարոնմարգարյանական ծառատունկ»:
Մեկ ծառ տնկելու համար հավաքվել էին մեծ ու փոքր, անգամ՝ Արտգործնախարար Էդվարդ Նալբանդյանը, որ ծառը պահեր, բայց դե Տարոն Մարգարյանը ծա՞ռը բռներ, ջո՞ւրը լցներ, թանկարժեք կոշիկներով հարթեցնե՞ր հողը, բահի պո՞չը բռներ, ծա՞ռը տնկեր, թե՞ նայեր տեսախցիկներին:
Այդ միայնակ խեղճ ծառը տնկվեց ու երևի թե երջանիկ դարձավ, քանի որ երկար տառապանքներից հետո վերջապես հասավ հանգրվան-հողին: Մեկ ժամ մեկ ծառի համար հանդիսականները սպասում էին, դեռ լույսը չէր բացվել, որպեսզի նման իրադարձությունից չուշանան և հանդիսավոր պայմաններում, երբ Մարգարյանը ծառը հանձնի հողին, պատմական պահը չկորցնեն:
Ի դեպ, հավաքվածները խոսում էին, որ Տարոն Մարգարյանն անձամբ է գրել «մեկ ծառ» օպերացիան: Որքան էլ զարմանալի է, նա քաղաքապետի իր պարտականություններին, պարզվում է, լրջորեն է մոտենում:
Խեղճ ծառը երևի արդեն մտածում էր թառամելու մասին, բայց դե հերոսաբար դիմացավ, քանի որ այլ տարբերակ չուներ. չորանալու պարագայում մեղադրելու էին ծառին, որ իր պարտականությունները թերակատարել է կամ լավ չի կատարել, գուցե հարկերը ժամանակին չի մուծել և ինքնաչորացել է:
Եվ երբ արդեն ծառը բարեհաջող հողի մեջ էր` Նալբանդյանի անմիջական և գործուն աջակցությամբ, Տարոն Մարգարյանի կոշիկները համաձայնեցին թեթևակի հարթեցնել հողը և ջուր ցողել ծառին: Բարձրյալի օրհնությամբ ծառը վերջապես հանգրվանեց այնտեղ, որտեղ պետք էր հանգրվաներ, և այդ արարողության համար քաղաքապետարանը մեկ կլորիկ գումար էր առանձնացրել Տարոն Մարգարյանի քաջառողջության համար համար, որը մասնակի քայքայվեց ծառատնկման ընթացքում:
Չէ՞ որ նա իր ծանր տեղը նախ թեթևացրել էր, հետո համաձայնել էր ծառին դիպչել, նաև համոզվել էր, որ ծառը ենթակա է տնկման, կարող է բերք տալ, եկամուտ բերել, նաև տնտղել էր չորսբոլորը, որ ապահով է տեսախցիկներով, համապատասխան քանակի հանդիսականներով, ծափահարողներով: Դրանից հետո, Բարձրյալի օգնությամբ, Նալբանդյանի անմիջական մասնակցությամբ ծառը հանձնեց հողին և սուրբ վայրերից օրհնության ուղերձ էր եկել քաղաքապետարան` ծառի բարեհաջող տնկման դեպքի առնչությամբ, և օրհվեց այդ ծառը, քանի որ հազարավոր ծառերի մեջ, որ կտրվել և արմատախիլ էին արվել, Երևանում այս մեկ ծառը պետք է բարեխոս հանդիսանա Սուրբ Պետրոսի առաջ` երբ կգա ոմանց համար դրախտի կամ դժոխքի դռներից ներս խցկվելու ժամանակ:
Իհարկե, անտեսենք, որ Տարոն Մարգարյանը ոչ թե իր տնկած ծառին էր նայում, այլ տեսախցիկներին և համապատասխան դիրքեր ընտրում՝ ըստ այդմ, իսկ ո՞վ թերություն չունի: