Ջրպետկոմը ոռոգման խնդիրը լուծելու փոխարեն` պատին թիթեռ է նկարում
Այն, որ այս տարի ոռոգման ոլորտում խնդիրները բազմապատկվելու են, արդեն ակնհայտ է: Այդ իսկ պատճառով կառավարությունը պահուստային ֆոնդից 70.458.5 հազար դրամ է հատկացնում Ջրային տնտեսության պետական կոմիտեին:
ՀՀ կառավարության որոշման հիմնավորման համաձայն նախատեսվում է իրականացնել Արարատյան դաշտի 26 համայնքում խորքային թվով 38 նոր հորի հորատման, ինչպես նաև գոյություն ունեցող թվով 17 հորի վերականգնման աշխատանքներ:
Առավել առաջնահերթ են համարվում 15 համայնքում խորքային թվով 23 նոր հորի հորատման, այդ թվում՝ Սև ջրի ավազանը ջրալրող, ինչպես նաև գոյություն ունեցող թվով 14 հորի վերականգնման աշխատանքները, որոնք իրականացվելու են առաջին փուլով:
Առաջին փուլի աշխատանքների իրականացման արդյունքում, նախնական հաշվարկներով, լրացուցիչ կարտադրվի շուրջ 17,6 մլն մ3 ջուր, որը հնարավորություն կտա բարձրացնել շուրջ 931 հա հողատարածքի ջրապահովվածության աստիճանը:
Հորերի շահագործման դեպքում էլեկտրաէներգիայի ծախսը կկազմի շուրջ 6,2 մլն կՎտ.ժամ: Առաջին փուլով առավել հրատապ աշխատանքների իրականացման համար կպահանջվի շուրջ 970 մլն դրամ, որից նախագծանախահաշվային աշխատանքների համար 35.46 մլն դրամ:
Արարատյան դաշտում, մասնավորապես՝ Արմավիրի մարզում, նախորդ տարիներին ևս հորեր են փորվել` կառավարության աջակցությամբ, սակայն այս տարի ձմեռային աննախադեպ վիճակը ստիպում է գնալ ծայրահեղ քայլերի: Իսկ ինչո՞ւ է նման իրավիճակ:
Նշենք, որ ջրամբարները մոտավորապես լցված են 50 տոկոսով, այն դեպքում, երբ հանրապետությունում կա մոտ 80 մեծ ու փոքր ջրամբար: Հավելենք նաև, որ այդ ջրամբարները խորհրդային շրջանից են ժառանգություն մնացել և կարոտ են նորոգման կամ պատնեշի բարձրացման, որը ևս խնդրի լուծում է, սակայն ո՛չ վերանորոգում է իրականացվում, ո՛չ էլ պատնեշներն են բարձրանում: Այս միջոցառումները թույլ կտային համայնքների ցանքատարածություններն ավելացնել և լրացուցիչ եկամուտներ ստանալ:
Իսկ ինչո՞ւ է Ջրպետկոմը կառուցում Վեդիի ջրամբարը՝ այն դեպքում, երբ եղած ջրամբարներն օգտագործելով՝ հնարավոր է ջրապահովածությունը բավարարել:
Պարզապես նոր ջրամբար կառուցելով՝ հսկայական գումարներ անհետանում են, մինչև այն հասնում է բուն ջրամբարին, իսկ եղած ջրամբարների համար, եթե վերանորոգումների համար նույնիսկ գումարներ տրամադրվեն, ապա ստիպված կլինեն այդ գումարները ծախսել, ոչ թե հաշվետվություններ նկարելով՝ պատնեշներ կառուցել կամ էլ բետոնապատել:
Այդ է պատճառը, որ Ջրպետկոմի ուշադրությունը ոչ թե եղածը վերանորոգելու, այլ նոր ջրամբար կառուցելու ուղղությամբ է գնում: Ջրպետկոմն այս տարիներին ոռոգման համակարգը բարելավվելու համար հսկայական գումարներ է ծախսել, սակայն երկրում գեթ մեկ համայնք չկա, որտեղ լուծված լինի ոռոգման խնդիրը: Դրան գումարվում է ջրային ոլորտի մասնագետների հարցը, ովքեր ո՛չ ոլորտից են գլուխ հանում, ո՛չ էլ առանձնապես ցանկություն ունեն: Միայն թղթի վրա ինչ-որ ցուցանիշներ են ցուցադրվում, իսկ իրականում ՀՀ-ում ոռոգման ոլորտը ողբալի վիճակում է:
Արարատյան դաշտում նոր հորեր հորատելով կամ նոր ջրամբար կառուցելով` ոռոգման խնդիրները հեռու են լուծում ստանալուց, եթե նկատի ունենանք, որ ոլորտում ջրի կորուստները տարբեր հաշվարկներով հասնում են 70-ից 85 տոկոսի. ոչ թե այս խնդիրն են լուծում, այլ պատին թիթեռ են նկարում: