ԱՄՆ-ն աջակցում է Սերժ Սարգսյանին
«ԱՄՆ-ն չի աջակցում այնպիսի խմբերի, որոնք փորձում են անօրինական ճանապարհով տապալել ընտրված իշխանություններին, և հատկապես այնպիսի խմբերին, ինչպիսին «Սասնա Ծռերն» են, որոնք բռնությունը գերադասում են երկխոսությունից, միանշանակ դատապարտում են». օրերս նման հայտարարություն է արել ՀՀ-ում ԱՄՆ դեսպան Ռիչարդ Միլսը:
Արդեն երկու տարուց ավելի է, ինչ «Սասնա Ծռերի» կողմից ՊՊԾ գնդի գրավման իրողությունը և դրանից բխող հետևանքները գործընթաց են ապրում, սակայն Միլսն այս պահին է նման հայտարարություն անում, երբ Հայաստանը կանգնած է նոր վարչապետ-նախագահ ունենալու շեմին, ավելին՝ նոր վարչապետը երկու անգամ նախագահ դարձած Սերժ Սարգսյանն է:
Դեսպանի հայտարարությունը պարզապես արտահայտում է իր երկրի տեսակետը և, ըստ այդմ, նա հրապարակավ մեսիջ է ուղարկում ՀՀ նախագահին, որ իրենք աջակցում են նրան թե՛ իբրև ընտրված նախագահի, և թե՛ վարչապետ ընտրվելու պարագայում:
Կարծ ասած՝ Միլսը դիվանագիտական լեզվով է շփվում ՀՀ վերնախավի հետ, իսկ կոդերն այնքան էլ բարդ չեն:
Նշանակում է, որ ԱՄՆ-ին ձեռնտու է Սերժ Սարգսյանի վարչապետացումը, իսկ թե ինչո՞ւ` այլ հարց է:
Թեև այս տարիներին Սերժ Սարգսյանը փորձում էր և՛ արևմտամետ, և՛ ռուսամետ քաղաքականություն տանել, սակայն ակնհայտ է և տրամաբանական, որ Սերժ Սարգսյանը ռուսական ազդեցության տակ է` իր կամքից անկախ կամ իր կամքով, իսկ ամերիկյան կողմի հավանությունը պարզապես իրողությունների հետ հաշվի նստող հայտարարություն է:
Իսկ ի՞նչ է շահում ամերիկյան կողմը Սերժ Սարգսյանի հերթական «նախագահականացումից»՝ դժվար է ասել, գուցե ելքեր են գտել, կամ էլ իրենց ձեռնտու է կանխատեսելի նախագահ, քան անկանխատեսելի: Ի վերջո, Դոնալդ Թրամփի քաղաքականությունը ևս մի փոքր անկանխատեսելի է:
Այնպես որ՝ ամերիկյան կողմն արձանագրում է, որ դեմ չէ նոր վարչապետ-նախագահին, որի հետ կաշխատի նաև ապրիլից հետո և եթե «Սասնա Ծռերի» առնչությամբ մի փոքր վերապահումներ ուներ, հիմա դրանք արդեն չկան. հայտարարությունը նաև այդ մասով էր:
Այնպես որ՝ Միլսը կանաչ լույս վառեց Սերժ Սարգսյանի համար` դեպի վարչապետացում կամ էլ այն քաղաքականությունը, որը տանում է կամ կտանի ապագայում: Բոլոր նման խնդիրները կարծես թե լուծված են. ամերիկյան կողմի «դաբրոն» Սերժ Սարգսյանը ստացավ: