Չամիչով փլավ, ներկած ձու. Ապրիլի մեկին Զատիկն է
Մեծ պահքը բաղկացած է 7 կիրակիներից, տևում է 48 օր, վերջին շաբաթը կոչվում է Ավագ շաբաթ, երբ տեղի են ունենում Քրիստոսի կյանքի վերջին իրադարձությունները: Այսօր երեկոյան կատարվում է Քրիստոսի թաղման արարողությունը, դա խորհրդանշում է՝ հին մարդը պատրաստ ենք մահացնելու, որպեսզի նոր մարդը ծնվի: Շաբաթ օրը կատարվում է ճրագալույցի պատարագ, այդ ժամանակ Քրիստոսի հարության բարի լուրը տրվում է: Այսօր լրագրողների հետ հանդիպման ժամանակ Պահքի մասին մանրամասներ ներկայացրեց Սուրբ Գրիգոր Լուսավորիչ մայր եկեղեցու հոգևոր հովիվ Տեր Հակոբ քահանա Խաչատրյանը:
Ըստ նրա՝ մարդը պահքի մեջ է մտնում՝ ինչ-որ սխալներից ազատվելու համար, հետևաբար պահքը ներքին ուրախություն է: Պահեցողությունը նաև ներքին հոգևոր վիճակի բնական պահանջ է, որովհետև մարդը, երբ մեղք է գործում, նրա մոտ առաջանում են որոշակի հոգեբանական և հոգևոր խնդիրներ՝ իրականության զգացողության կորուստ, տագնապի զգացողություն, մեղավորության զգացում, շնչարգելության, բայց դրանով հանդերձ՝ մարդը գիտի, թե ինչի հետ է դա կապված:
Քահանան բացատրեց, որ այն մարդիկ, ովքեր պահք են պահում, պահքից դուրս գալու մեկ ճանապարհ ունեն՝ ստանալ սուրբ հաղորդություն, և պատարագի օրը մարդիկ պիտի ստանան սուրբ հաղորդություն: Նրանք պիտի ոչինչ ճաշակած չլինեն, ստանան սուրբ հաղորդություն, հետո պատրաստեն Զատկի կերակուրները: Չամիչով փլավի բրինձը խորհրդանշում է ամբողջ մարդկությանը, չամիչը՝ ընտրյալներին, ձուկը՝ քրիստոնյաներին, կարմիրով ներկված ձուն՝ Քրիստոսի արյունը:
Իսկ այն, որ հաճախ հինգշաբթի օրը մարդիկ երբեմն հավկիթ է ներկում, Տեր Հակոբ քահանա Խաչատրյանը բնորոշեց ենթագիտակցական ինչ-որ բան: