Հայկական ֆուտբոլի գերեզմանափորը տղամարդու խոսքը չպահող Հայրապետյանն է
Երեկ Հայաստանի ազգային հավաքականը կրեց իր հերթական՝ խայտառակ պարտությունը: Լիտվան հյուրընկալվելիս մերոնց փնթիության հետևանքով գրավեց մեր ընտրանու դարպասն ու Հայաստանից հեռացավ հաղթողի կարգավիճակով: Օրեր առաջ Հայաստանը 0-0 էր խաղացել բալթյան մյուս պետության՝ Էստոնիայի հետ:
Այն, որ Հայաստանի ֆուտբոլը գնալով ավելի խայտառակ է դառնում, դրա մասին փաստում են սպորտային մեկնաբանները, մենք այս ամենի մասին շատ կարճ այլ ձևակերպումներ կտանք:
Ֆուտբոլային այս խայտառակության թիվ մեկ մեղավորն ու պատասխանատուն իր տղամարդկային խոսքը չպահած Ռուբեն Հայրապետյանն է: Բոլորս էլ հիշում ենք, որ ֆուտբոլի երկրպագուների հետ հանդիպմանը Հայրապետյանը հայտարարեց բառացի, որ եթե մեր ընտրանին տապալի Աշխարհի առաջնության ընտրական փուլի հերթական ցիկլը, ինքը տղամարդու խոսք է տալիս, հրաժարականի դիմում կներկայացնի:
Հայաստանի հավաքականն ընտրական ցիկլում խայտառակ արդյունքներ գրանցեց, իսկ Հայրապետյանն այդպես էլ չհեռացավ՝ մոռանալով, որ տղամարդկային խոսք է տվել: Իսկ տղամարդկային խոսքը չպահելն արդեն խոսում է ամեն ինչի մասին: Տղամարդկությունը միայն հայհոյելով ու մարդ ծեծելով չէ: Տղամարդկությունը, պարո՛ն Հայրապետյան, սեփական արժանապատվության պահպանումն է, իսկ քանի Դեռ դուք դրժում եք Ձեր տղամարդկային խոսքը, ուրեմն արժանապատվության մասին խոսելն անիմաստ է:
Ռուբեն Հայրապետյանը չի հեռանա ֆեդերացիայի ղեկավարի պաշտոնից, որովհետև այն իր սեփականությունն է դարձրել: Ֆեդերացիան դարձել է Հայրապետյանի բիզնեսի հիմքը: Թե էլ ինչպես է Հայրապետյանը ֆեդերացիան օգտագործում՝ հանուն սեփական շահերի, հայ ֆուտբոլասերները և ոչ միայն, լավ գիտեն, ասենք միայն այն, որ եթե նա չի հեռանում ու չի թողնում ֆուտբոլը մեր երկրում զարգանա, ուրեմն ինչ-որ բան ինչ-որ տեղ սխալ է:
Ռուբեն Հայրապետյանը զգալի հարգանք ու պատիվ կունենա այն օրը, երբ հեռանա ֆեդերացիայի նախագահի պաշտոնից՝ իր տեղը զիջելով երիտասարդ ու խոստումնալից այլ կադրի: Բայց քանի դեռ նա մնում է, մենք պարտավոր ենք արձանագրել, որ հայկական ֆոտբոլը թաղվել է հողի տակ, իսկ մեր ֆուտբոլի գերեզմանափորը հենց Ռուբեն Հայրապետյանն է:
Որպես հետգրություն ավելացնենք, որ մի Մխիթարյանով մխիթարվել չենք կարող:
Արիանա ՀՈՎՍԵՓՅԱՆ
NEWSPRESS.am-ի հիմնադիր-տնօրեն