Ինչո՞ւ պետք է հեռացվեն այս երեք նախարարները
Առաջիկայում Հայաստանում տեղի են ունենալու փոփոխություններ, ձևավորվելու է նոր կառավարություն, երկիրն անցնելու է պառլամենտական կառավարման: Չնայած երկու շաբաթ դեռ կա այդ փոփոխություններին, բայց այսօր պարզից էլ պարզ է, որ վարչապետի և դրանից բխող նաև երկրի կառավարման ղեկը ստանձնելու է ՀՀ գործող նախագահ Սերժ Սարգսյանը:
Կառավարման համակարգի և նոր վարչապետի ընտրվել-նշանակվելուն զուգահեռ, պարզ է դառնում, որ փոխվելու են նաև որոշ նախարարներ, որոնց աշխատանքը ո՛չ հանրությանն է գոհացրել, ո՛չ էլ իշխանություններին:
NEWSPRESS.am-ը կազմել է ցանկ, թե որ նախարարները պետք է անհապաղ հեռացվեն իրենց պաշտոններից՝ խայտառակ կառավարման և ոլորտներն անկայունացնելու համար:
Ստորև ներկայացնում ենք մեր ցանկն ու պատճառները:
1-ին հորիզոնականում չարաբաստիկ Լևոն Ալթունյանն է:
Նույն ինքը՝ առողջապահության նախարարը, որն այնքան է ատում հայ ազգաբնակչությանը, որ նշանակվելու պահից սկսած՝ զբաղվում է ո՛չ թե մարդկանց առողջացնելու, այլ նրանց մոտ մահ առաջացնելու գործընթացով և դրանով միլիոններ է կուտակում: Այս նախարարը, որ ապահովագրական բիզնեսի սեփականատեր է և դոլարային միլիոնատեր, նշանակվելուց հետո սկսեց մեկը մյուսի հետևից վատություն անել ողջ ազգին:
Նախ Գարդասիլի պատվաստումները, հետո պետպատվերի՝ գրեթե չեղարկումը, հետագայում ծխախոտի մասին օրենքի միջոցով ցանկացավ թալանել ծխող ազգաբնակչությանը: Լևոն Ալթունյանի վերջին՝ էլեկտրոնային պարտադրանքն էլ, որի միջոցով Ալթունյանն սկսում է փող աշխատել թե՛ կառավարությունից, թե՛ մասնավորից, թե՛ պետբյուջեից, արդեն լցրել է համբերության բաժակը:
Մեր ցանկում նրան անվանենք կառավարության ամենախայտառակ դեպք և կոչ անենք ազատվել այս չարիքից:
2-րդ հորիզոնականում Հրանուշ Հակոբյանն է:
Արդարության դեմ չմեղանչելով՝ պետք է ասենք, որ տարիներ շարունակ Հայաստանի ամենախայտառակ նախարարը եղել է Հրանուշ Հակոբյանը։ Նա կմնար առաջին տեղում, եթե Ալթունյանը չհայտնվեր ու չգերազանցեր նրան։
Մի քանի ամսից կլրանա 10 տարին, ինչ Հրանուշ Հակոբյանը ղեկավարում է Սփյուռքի նախարարի պաշտոնը: Այս նախարարությունն ստեղծվեց անձամբ Հրանուշ Հակոբյանի համար: Հրանուշ Հակոբյանը տասը տարվա ընթացքում միայն հարստացավ ու խայտառակեց մեր երկիրը: Տարիներ առաջ Հակոբյանը անգամ մեդալ էր տվել Մեսրոպ Մաշտոցին՝ հետմահու: Նրան ծաղրեցին, նրան քննադատեցին, բայց, մեկ է, կոմունիստական գաղափարախոսության կրողն ու վերջին կոմսոմոլ քարտուղարը շարունակում է ստալինյան ոճով՝ «Մեդալ կախեմ քո դոշին, մեռնեմ կարմիր դրոշին» քաղաքականությունը:
Հրանուշ Հակոբյանի վերջին խայտառակությունը Երևանի փողոցներում քաղաքացիների վրա մունաթ գալն էր: Տիկինը «մունաթախառը» «պլակատներով» քիչ է մնում գոռա մեզ վրա՝ «ի՞նչ ես արել Արցախի համար»: Այստեղ մարդիկ զայրանում են՝ մենք հանուն Արցախի վատ ենք ապրում, մենք հանուն Արցախի քո նման կոմունիստին ենք հանդուրժում, մենք հանուն Արցախի 18-20 տարեկան տղա-երեխեք ենք մատաղ անում, որ դու «պադավատով» ման գաս ու մեզ վրա մունաթ գաս: Այնպես որ՝ Հրանուշ Հակոբյանի պաշտոնանկությունը հայ ազգի պատիվն ու արժանապատվությունը վերականգնելու լուրջ քայլ կլինի:
Խայտառակ նախարարների 3-րդ հորիզոնականում հանգրվանել է Կրթության և գիտության դաշնակցական նախարար Լևոն Մկրտչյանը:
Լևոն Մկրտչյանն այս ցանկում իր դիրքերը «բարելավեց» Շիրակի համալսարանի վերջին՝ սկանդալային դեպքերից հետո: Նախարարի թողտվությամբ Շիրակի բուհից ազատվեց երկու դասախոս՝ Գագիկ Համբարյանն ու Հովհաննես Խորիկյանը, ովքեր ի լուր աշխարհի հայտնում էին այն չարաշահումները, որոնք կատարվում էին բուհում: Լևոն Ալթունյանը մեր կրթության ոլորտում աշխատելու էլի փորձեր է ունեցել: Նա հին է, պարոնա՛յք և տիկնայք, այնքան հին, որ այս մարդը պարզապես չի կարող նոր համակարգ ու արդի կրթական ծրագիր բերել, որպեսզի աշխարհի հետ մրցունակ դառնա:
Լևոն Մկրտչյանը պետք է պաշտոնանկ արվի, թեկուզ և հենց այն պատճառով, որի իր ոլորտում թույլ է տալիս հեռացնել պրոֆեսոր դասախոսի, ով համարձակություն է ունեցել խոսելու ռեկտորի կոռումպացված լինելուց։ Այն էլ այն ռեկտորի, ով անօրինական ճանապարհով է հայտնվել իր պաշտոնում։ Այնպես որ, նաև որպես թույլ ու տեղում դոփող նախարար, Մկրտչյանը խայտառակ նախարարի երրորդ հորիզոնականում պահպանում է իր դիրքերը։
Շարունակելի…
Արիանա ՀՈՎՍԵՓՅԱՆ
NEWSPRESS.am-ի հիմնադիր-տնօրեն