«Թռչում եմ Երևան»․ Լապշինը կրկին Հայաստանում է
Ռուսաստանի և Իսրայելի քաղաքացի, բլոգեր Ալեքսանդր Լապշինը, այցելել է Հայաստան։ Այդ մասին նա գրել է ֆեյսբուքյան իր էջում։
Լապշինը Երևանում է մասնակցելու Expo 2018 միջազգային զբոսաշրջային ցուցահանդեսին:
Նա կատակել է, որ Հայաստանում ներկայացնելու է Ադրբեջանում ունեցած իր «ճանապարհորդությունը»:
«Թռչում եմ Երևան մասնակցելու զբոսաշրջային ցուցահանդեսիմ։ Ներկայացնելու եմ իմ հեղինակային ծրագիրը՝ «Բաքվում՝ Լապշինի հտքերով», որի ծրագրում՝ թռիչք Մեհրիբան Ալիևիայի անձնական ինքնաթիռով, հանգիստ Քյուրդախանի բանտում՝ all inclusive, և ծանր հանցագործությունները քննող Բաքվի դատարան:
Տուրի արժեքը՝ պայմանագրային… Կատակ:
Իրականում ցուցահանդեսին պատմելու եմ ճանապարհորդությունների մասին, հետաքրքիր է լինելու, այցելեք»,- գրել է Լապշինը:
Հիշեցնենք, որ Լապշինն առաջին անգամ Հայաստան և Արցախ է այցելել 2011 թվականին: Լապշինը ձերբակալվել էր 2016 թվականին Բելառուսում՝ Ադրբեջանի հարցման համաձայն: Պաշտոնական Բաքուն բլոգերին «սև ցուցակ»-ի մեջ էր ներառել Լեռնային Ղարաբաղի Հանրապետություն այցելելու համար:
Բելառուսի Գերագույն դատարանը 2017 թվականի փետրվարի 7-ին մերժել էր Լապշինի բողոքը՝ կապված Բելառուսի Գլխավոր դատախազության որոշման հետ, որով Լապշինը պետք է արտահանձնվեր Ադրբեջան: Լապշինը նույն օրը հատուկ չվերթով տեղափոխվել էր Մինսկից Բաքու ` պետական անվտանգության ծառայության աշխատակիցների
ուղեկցությամբ: Ծանր հանցագործությունները քննող Բաքվի դատարանում հուլիսի 20-ին հրապարակվել էր ՌԴ և Իսրայելի քաղաքացի բլոգեր Ալեքսանդր Լապշինի գործով դատավճիռ. նա դատապարտվել էր 3 տարվա ազատազրկման:
2017 թվականի սեպտեմբերի 11-ին Իլհամ Ալիևը ներում շնորհեց Լապշինին։