«Պատգամավորն ի՞նչ կապ ունի, արա, հեսա կտամ չանեդ կծռեմ»․ Միջադեպ ԵՊՀ-ում՝ ԱԺ պատգամավոր-դասախոսի ու ուսանողի միջև
Երեկ «Ֆեյսբուք» սոցիալական կայքում ակտիվորեն քննարկվում էր ԵՊՀ-ում տեղի ունեցած կոնֆլիկտը՝ ուսանողի ու դասախոսի միջև։ NEWSPRESS.am-ի հետ զրույցում ԵՊՀ Իրավագիտության ֆակուլտետի 3-րդ կուրսի հեռակա ուսուցման ուսանող Արմեն Գալջյանը պատմեց միջադեպի մասին ու դրանից հետո տեղի ունեցած իրադարձությունների մասին։
«ԱԺ «Ծառուկյան» խմբակցության պատգամավոր, ԵՊՀ Իրավագիտության ֆակուլտետի աշխատանքային իրավունք առարկայի դասախոս Գևորգ Պետրոսյանը պահանջեց, որ ես դուրս գամ լսարանից, քանի որ սափրված չեմ։ Ես նրանից իրավական հիմք պահանջեցի, ըստ որի՝ ես պարտավոր եմ սափրված ներկայանալ դասի, բայց նա չկարողացավ ներկայացնել այդ իրավական հիմքը։ Հետո ինձ դուրս հրավիրեց լսարանից և միջանցքում ասաց, որ գնամ դեկանի մոտ, ով թույլ կտա նստեմ դասին։ Ես գնացի դեկանի մոտ, ներկայացրեցի իրավիճակը, և նա ասաց, որ չկա նման իրավական հիմք, որ չսափրվելու համար ինձ չթողնեն դասի նստեմ և ասաց, որ կարող եմ գնալ ու մասնակցել դասին։ Երբ վերադարձա լսարան, Գևորգ Պետրոսյանին ասացի, որ դեկանն ինձ թույլատրել է մասնակցել դասապրոցեսին, և նա ասաց, որ մյուս անգամ սափրված գամ, իսկ ես ասացի, որ ինքս կորոշեմ»։
Ուսանողն ընդգծեց, որ այդ խոսակցությունից հետո նոր զարգացումներ տեղի ունեցան, ու հետագա խոսակցությունները դարձան ավելի լարված։
«Նա ավելի զայրացավ և մենք միասին գնացինք դեկան Գագիկ Ղազինյանի մոտ, որտեղ նա ինձ ասաց․- «Դու ո՞վ ես վաբշե, դու գիտե՞ս՝ ես ով եմ»:- Ես պատասխանեցի,- Դուք ԱԺ պատգամավոր եք և դասախոս,- որին նա արձագանքեց,- «Պատգամավորն ի՞նչ կապ ունի, արա, հեսա կտամ չանդ կծռեմ»։ Հետո դեկանն ինձ ասաց, որ մենակ թողնեմ իրենց, և ես գնացի լսարան, մինչև Պետրոսյանը վերադարձավ լսարան և ես փորձեցի մտնել դասի, բայց նա չթողեց։ Մի քանի անգամ ես ասացի, որ դասն ինձ հետաքրքիր է ու ես ցանկանում եմ նստել դասին։ Ես մտա լսարան ու մասնակցեցի դասապրոցեսին»։
Ուսանողը հավելեց, որ դասապրոցեսի սկզբում դասախոսը լսարանից դուրս էր հրավիրել բոլոր այն ուսանողներին, ովքեր սափրված չեն եղել։ Ուսանող Արմեն Գալջյանը նշեց նաև, որ հաջորդ օրը նրան դեկանատից տեղեկացրել են, որ ծառայողական քննություն է սկսվել, և պետք է բացատրագիր գրել։
Հավելնեք նաև, որ ուսանող Արմեն Գալջյանը հանդիսանում է «Քաղաքացիական պայմանագիր» կուսակցության և «Ելք» դաշինքի անդամ։ Նա հանդիսանում է նաև ԱԺ «Ելք» խմբակցության ղեկավար Նիկոլ Փաշինյանի օգնականը։ Ուսանողն ընդգծեց նաև, որ միջադեպի ժամանակ Գևորգ Պետրոսյանը չի իմացել, որ ուսանողը Նիկոլ Փաշինյանի օգնականն է։