«Ես կապ չունիմ, իմ գործս չէ»․ Գյումրիի թիվ 2 դպրոցի տնօրենն արձագանքեց իր դեմ ուղղված մեղադրանքին
Շիրակի պետական համալսարանի ռեկտոր Սահակ Մինասյանն ուսանողների վրա փորձում է ճնշում գործադրել։ Այդ մասին «Անդրադարձ» մամուլի ակումբում հայտարարել է Շիրակի պետհամալսարանի ուսխորհդի նախագահ Արմեն Մելքոնյանը։
Մասնավորապես՝ խոսքն այն մասին էր, որ ռեկտոր Մինասյանն օգտագործում է բոլոր իր լծակները՝ ուսանողներին բոյկոտի ակցիաներից հետ պահելու համար․ անգամ նրանց խոստանում է ավճար ուսում, լավ գնահատականներ և այն, ինչ կարող է խոստանալ ռեկտորն ուսանողներին, մեղմ ասած, որպես «կաշառք»։
NEWSPRESS.am-ը տեղեկացավ նաև, որ Մինասյանի համար «աշխատում» են նաև նրա մտերիմներն ու մերձավորը։ Որպես այդպիսին շոշափվում է նաև Գյումրիի Վահան Թեքեյանի անվան թիվ 2 ավագ դպրոցի տնօրեն Հովհաննես Պետրոսյանի անունը։ Ըստ տեղեկությունների՝ տնօրենը զանգահարել է համալսարանում սովորող իր շրջանավարտներին և կանչել իր մոտ՝ հորդորելու «հեռու մնալ» ակցիաներից։
«Ես չեմ վարվել նման ձև․․․ ի-ի-ի՞նչ տվյալ, ո՞վ է տվել Ձեզ այդ տվյալը»,- փոքր-ինչ շփոթված հարցրեց դպրոցի տնօրենը և հավելեց․ «Ո՜չ, ես ոչ մի բան չեմ հորդորել, Դուք կարող եք գալ, ճշտել, որ մեր նախկին շրջանավարտները՝ տարբեր բուհերից ու նույնիսկ Երևանից, դպրոցի հետ կապը չեն կտրել և յուրաքանչյուր օր կարող են գալ դպրոց՝ այցի իրենց ուսուցիչներին: Ընդամենը»,- ասաց Հովհաննես Պետրոսյանը։
«Ես չգիտեմ էլ՝ Դուք ինչ եք ասում, բայց էսօր էլ էլի 3 շրջանավարտ էին եկել մեզ հետ հանդիպելու»,- հավելեց տնօրենը։
Դաշնակցական տնօրենը նշեց, որ ՀՀԿ-ական ռեկտոր Մինասյանի հետ ընդհանրապես իրեն ոչինչ չի կապում։ Չհաշված այն տարիները, որ Մինասյանի հետ աշխատել է այն ժամանակ, երբ վերջինս դեռ կրթության վարչության պետն էր։
Պետրոսյանը խուսափեց մեկնաբանելուց համալսարանում ստեղծված իրավիճակն ու երևույթն առհասարակ՝ անտեսելով նույնիսկ այն հանգամանքը, որ իր դպրոցի շրջանավարտները ևս այդ հաստատության ուսանողներ են։
«Ես կապ չունիմ, իմ գործս չէ»,- ասաց դպրոցի տնօրենը։
Այսինքն` Ձեր «աջը քաշած», Ձեզ համար աշխատո՞ւմ եք, հարցին նա կրկին արձագանքեց․
«Ես կապ չունիմ, ես դրա հետ ի՞նչ կապ պետք է ունենամ»։