Ցար Պուտինի գահակալման նոր շրջանն ու խոնարհ և խեղճ ռուսաստանցիները
NEWSPRESS.am-ի հիմնադիր-տնօրեն Արմենուհի (Արիանա) Հովսեփյանը ֆեյսբուքյան իր էջում գրել է.
«Ոչ ոք չէր էլ կասկածում, որ Ռուսաստանի գործող նախագահը կվերընտրվի և կշարունակի պաշտոնավարել: Սա գիտեին թե' ՌԴ քաղաքացիները, թե' Արևմուտքը, թե՛ միջազգային ու տեղական բոլոր կազմակերպությունները:
Բոլորն անխտիր:
Բանն այն է, որ Ռուսաստանում դարեր ի վեր իշխանությունը եղել է մեկ մարդու ձեռքին՝ առաջնորդի: Մի ժամանակ այդ առաջնորդին անվանել են ցար, մի ժամանակ եկավ, երբ առաջնորդին համարեցին Կոմկուսի առաջին քարտուղար, հետո նախագահ: Բայց, մեկ է, անունը փոխելուց ոչինչ չի փոխվում: Բռնապետությունը մնում է բռնապետություն:
Անկեղծ լինելով՝ ասենք, որ Ռուսական կայսրությունը մեկ րոպեում կփլուզվի, եթե անծայրածիր այդ երկրում իշխանությունը լինի ժողովրդավարական:
Ինքներս մեզ չխաբենք և արձանագրենք, որ Վլադիմիր Պուտինը 76 տոկոս ձայներ հավաքելով՝ ի լուր աշխարհի ևս մեկ անգամ հայտարարեց, որ ինքն անունով թեպետև նախագահ է, բայց կոչմամբ Ռուսական կայսրության ցարն է: Ցարը, ում գահակալությունը հաշվարկվում է 2000 թվականից:
Հաշվի առնենք, որ Պուտինը որպես անհատ ոչինչ անելու ունակ չի լինի, եթե իր թիկունքում չունենա «կրեմլի աշտարակների» աջակցությունը: Այստեղ արդեն խոսքը ոչ միայն անձերի, այլ նաև բռնապետական այն հսկա ինստիտուտի մասին է, որը դարեր ի վեր իր ձեռքում է կենտրոնացրել իշխանությունը: Պուտինն արդեն ծերացման եզրին է: Նախագահի այս շրջանն ավարտելուց հետո նա կդառնա 71 տարեկան: Ժամանակից առաջ չընկնելով՝ չենք ցանկանում գուշակություններ անել, թե որքան կմնա գահին, բայց եթե չլինի Պուտինը, հավատացեք կլինի մեկ այլ «Իվան Ահեղ»:
Այնպես որ՝ ՌԴ-ում կայացած «Նախագահական ընտրություններին», իհարկե եթե այդ թատրոնին կարելի է անվանել ընտրություն, անակնկալ ոչինչ էլ չի եղել: Պուտինը մնացել է, կեցցե Պուտինը:
Պուտինի շռնդալից հաղթանակի ֆոնին երևում է ՌԴ քաղաքացիների խեղճությունն ու տկարությունը: Կադրերը դիտելիս մենք ականատես ենք լինում խեղճ, գլխիկոր քաղաքացիների, որոնց ստորացնելով ստիպում են ընտրել.... Սա, բնականաբար, բռնապետության բաղկացուցիչ մասն է: Որքան անգրագետ ու գլխիկոր է ժողովուրդը, այնքան ամուր ու հզոր է բռնապետությունը:
Այստեղ՝ Երևանում և Գյումրիում, նույնպես մենք ականատես եղանք հազարավոր մարդկանց հրմշտոց-հերթերին, որոնք Պուտին ընտրելու էին շտապել:
Ի՞նչ կփոխվի Հայաստանում այս ընտրություններից հետո: Ոչինչ էլ չի փոխվի: Ամեն ինչ կմնա այնպես, ինչպես կա: Մենք՝ հայերս, պետք է ինքներս հզորացնենք ու շենացնենք մեր երկիրը, անկախ նրանից թե ով կլինի ՌԴ «ցարը»: Մեզ ի՞նչ, թե ով կլինի ՌԴ նախագահը: Մեր երկիրը, անկախ Պուտինից, շարունակվում է կործանվել: Աղքատություն, սով, հիվանդություններ, կոռուպցիա և գլխիկոր ժողովուրդ, որոնք մի քանի տարի անց գլուխները կախ գնալու են և ընտրեն ՀՀԿ-ին:
Ռուսաստանը կայսրություն է, որը կառավարում է աշխարհի մի զգալի մասը: Այդ առումով Պուտինը կարող է իրեն թույլ տալ արդարացնել բռնապետությունը, իսկ մեր բռնապետությունն արդարացման ոչ մի աղերս չունի, որովհետև մենք աշխարհի կողմից կառավարվող բռնապետություն ենք՝ մինչև կոկորդը ճահճում և կործանման եզրին կանգնած»: