«Հայաստանը քաղցկեղից մահացության ցուցանիշով 2-րդ տեղում է». Նիկոլ Փաշինյան
Հայաստանը քաղցկեղից մահացության ցուցանիշով 2-րդ տեղում է: Այս մասին ԱԺ Առողջապահության և սոցիալական հարցերի մշտական հանձնաժողովի նիստին հայտարարեց «Ելք» խմբակցության ղեկավար Նիկոլ Փաշինյանն ու առաջարկեց քննարկման առարկա դարձնել քաղցկեղի հետ կապված վերջին զեկույցը, համաձայն որի՝ ուռուցքային հիվանդություններից մահացության ցուցանիշով Հայաստանը 172 երկրի շարքում զբաղեցնում է երկրորդ տեղը:
Ի պատասխան Փաշինյանի առաջարկությանը` հանձնաժողովի նախագահ Հակոբ Հակոբյանը նշեց, որ առաջարկում է հանձնաժողովում քննարկել ոչ միայն քաղցկեղը, այլ ևս 2-3 հիվանդություն: «2017 թվականին մահացել է 27 000 մարդ, որից 15 հազարը արյան շրջանառության, 5700-ը՝ քաղցկեղի պատճառով»,- ասաց նա:
Առողջապահության փոխնախարար Սերգեյ Խաչատրյանն էլ հավելեց, որ Հայաստանում քաղցկեղից մահանում է շուրջ 5000 մարդ: «Քաղցկեղը, սիրտ-անոթային հիվանդություններն ու ևս երկուսը համարվում են ոչ վարակիչ հիվանդություններ և պետք է սրանք ևս ընդհանրացված ձևով քննարկել»:
Անդրադարձ կատարելով դեղատոմսերով դեղերի բացթողմանը՝ Փաշինյանը հարց ուղղեց փոխնախարարին. «Եթե կարելի է, այդ թեման պարզաբանեք, տեսնենք՝ քննարկման հարց մեզ մնացե՞լ է, թե մինչև մեր քննարկելը հարցը լուծվել է: Կառավարության կայքից ինչքան որ տեղեկատվություն ստացա՝ 70% մեղմվել է խնդիրը»:
Այս հարցադրմանն ի պատասխան՝ «Ծառուկյան» խմբակցության պատգամավոր Մարինա Մարգարյանը պատասխանեց, որ այս խնդրի շուրջ «Ծառուկյան» դաշինքը ներկայացրել է հայտ և ամսի 26-ին՝ ժամը 12:00-ին, ԱԺ նիստերի դահլիճում կկազմակերպվեն լսումներ: