«Ողջունելի է, որ ՌԴ-ում ապրիլյան պատերազմից փորձում են հետևություններ անել». Շավարշ Քոչարյան

«Մենք պետք է միշտ պատրաստ լինենք Ադրբեջանի կողմից ցանկացած սադրանքի»:

Այս մասին այսօր ճեպազրույցում հայտարարել է ԱԳ նախարարի տեղակալ Շավարշ Քոչարյանը։ Նրա խոսքով՝ շփման գծում Ադրբեջանական բանակի լայնածավալ զորավարժություններ սկսելը չպետք է որակել հնարավոր պատերազմի վտանգ։ 

Արձագանքելով լրագրողների դիտարկմանը, թե Երևանում Ռուսաստանի Դաշնային խորհրդի միջազգային քաղաքականության հարցերով հանձնաժողովի նախագահ Կոնստանտին Կոսաչյովը, խոսելով Ռուսաստանի կողմից Ադրբեջանին մատակարարվող սպառազինության մասին, հայտարարել է, որ իր տեղեկությունների համաձայն՝ 2016թ․ ապրիլից հետո նույն քանակությամբ սպառազինություն չի մատակարարվի Ադրբեջան, ԱԳ փոխնախարարը պատասխանեց.

«Ողջունելի է այն հանգամանքը, որ ապրիլյան պատերազմից փորձում են հետևություններ անել»։

Իսկ հարցին, թե արդյո՞ք Հայաստանի կողմից հայ-թուրքական արձանագրություները չեղարկելուց հետո թուրքիան փորձե՞լ է կապ հաստատել պաշտոնական Հայաստանի հետ այդ թեման քննարկելու համար, Շավարշ Քոչարյանը պատասխանել է:

«Կատարվել է նախագահի հանձնարարականն առ այն, որ թուրքական կողմը տեղեկացվել է այդ մասին և դա բխում է նաև միջազգային իրավունքից։ Միաժամանակ հիշեցնեմ, որ հայկական կողմը հայտարարել է, որ միշտ էլ պատրաստ է բանակցությունների միջոցով կարգավորել հարաբերությունները, բայց առանց նախապայմանների։ Այդ ուղղությամբ մենք որևէ առաջարկ չենք ստացել թուրքական կողմից»։