Մեծ Բրիտանիայի վարչապետ Թերեզա Մեյը մինչ կեսգիշեր վերջնագիր էր ներկայացրել Ռուսաստանին
Մեծ Բրիտանիան կոչ է արել ՄԱԿ-ի անվտանգության նիստ գումարել ՝ կապված գաղտնի ծառայության նախկին աշխատակից Սերգեյ Սկրիպալի թունավորման գործի հետ, որի հետևում, ըստ Մեծ Բրիտանիայի, կանգնած է Ռուսաստանը: Մեծ Բրիտանիայի վարչապետ Թերեզա Մեյը մինչ կեսգիշեր վերջնագիր էր ներկայացրել Ռուսաստանին, որպեսզի նրանք բացատրեն, թե ինչպես է քիմիական նյութը, որով թունավորվել են Սկրիպալն ու նրա աղջիկը, հայտնվել Բրիտանիայում:
Վարչապետ Թերեզա Մեյն ավելի վաղ հայտնել էր, որ եթե Ռուսաստանը բացատրություն չտա թունավորման դեպքի վերաբերյալ, ապա իրենք պատժամիջոցներ կկիրառեն Ռուսաստանի նկատմամբ: Իրենց հերթին ռուսական իշխանությունները հավաստիացնում են, որ Ռուսաստանն այդ ամենի հետ ոչ մի կապ չունի:
Հիշեցնենք, որ օրեր առաջ Մեծ բրիտանիայի Սոլսբերի քաղաքում հայտնաբերվել էին հատուկ ծառայությունների նախկին աշխատակից Սերգեյ Սկրիպալը և նրա աղջիկը՝ անգիտակից վիճակում: Տեղի հիվանդանոց տեղափոխելուց հետո պարզ էր դարձել, որ նրանք թունավորվել են նյարդային համակարգը կաթվածահար անող նյութով: Ավելի վաղ Ռուսաստանը Սկրիպալին մեղադրում էր ի օգուտ Մեծ Բրիտանիայի լրտեսություն կատարելու մեջ: