Լուրջ քննարկում եմ ունենալու Հ1-ի ղեկավարության հետ. Դավիթ Հարությունյանին մտահոգում է «Լավ երեկո»-ի ռեպորտաժը
Շատ մտահոգված եմ այդ դեպքով: Այդ մասին այսօր լրագրողների հետ զրույցում ասաց Արդարադատության նախարար Դավիթ Հարությունյանը՝ անդրադառնալով «Լավ երեկո» հաղորդման շուրջ ծավալված քննարկումներին:
Նախարարն ասաց, որ դա անթույլատրելի է, ինքը մտահոգված է այդ հարցով և շատ լուրջ քննարկում է ունենալու Հ1-ի ղեկավարության հետ՝ հավելելով, որ դա 2-րդ լուրջ բացթողումն է Հ1-ի կողմից։
Հիշեցնենք, որ «Լավ երեկո» հաղորդման անցած ուրբաթ օրվա թողարկումը քննադատության մեծ ալիք է բարձրացրել։ Պատճառներից մեկը լրագրող Արուս Տիգրանյանի՝ կանանց տոնին նվիրված շնորհավորանք-ռեպորտաժն էր «Աբովյան» ՔԿՀ-ից (Կանանց գաղութ)։
Լրագրողը հնարավորություն էր ունեցել մուտք գործել ՔԿՀ և զրուցել ամենախոցելի խավի՝ ազատազրկված կանանց հետ: Կանանց իրավունքների պաշտպանության օրը դատապարտված կանայք ծաղրի առարկա են դարձել, որի մեղավորն այս դեպքում թերևս ոչ միայն Հ1-ի ղեկավարությունն է, այլ՝ ՀՀ ԱՆ քրեակատարողական վարչությունը, որը ընտրողական մոտեցում է ցուցաբերել: