Գալուստ Սահակյանը կոռուպցիան տանում է իր ուսերին
Օրերս ՀՀ-ում ԱՄՆ դեսպան Ռիչարդ Միլզը հայտարարել էր, որ Հայաստանում իշխանությունը չարաշահվում է, իսկ տնտեսությունն ազատական չէ։
Նշենք, որ ԱՄՆ դեսպանը մեկ անգամ չէ, որ ուղղակի կամ անուղղակի խոսել է ՀՀ-ում կոռուպցիայի մասին։
Դեսպանի հայտարարությանն անդրադարձել է Էդուարդ Շարմազանովը՝ նշելով, թե ո՞ր երկրում կոռուպցիա չկա, նաև Գալուստ Սահակյանը, ով լինելով ավելի պերճախոս, փորձել է կոռուպցիայի բեռի գոնե մի մասը նետել ժողովրդի ուսերին. «Երբ ասում ենք՝ ժողովուրդ, ժողովրդի մեջ բոլորն են մտնում՝ և՛ իշխանությունը, և՛ սովորական մարդիկ, և՛ դուք, և՛ ես։ Ինչպիսին ժողովուրդն է, այդպիսի էլ ճակատագիր է ունենում»։
Այլ հարց է՝ կկարողանա՞ ժողովուրդը երկրի ողջ կոռուպցիան իր ուսերին տանել․ չէ՞ որ ձուկը գլխից է հոտում, իսկ Գալուստ Սահակյանն իրեն հատուկ ոճով փորձել է «լղոզել» դեսպանի հայտարարությունը՝ իշխանության, ոչ ազատական տնտեսության վերաբերյալ։
Թեև մեծ հաշվով Գալուստ Սահակյանը չէր կարող անտեսել ակնհայտ կոռուպցիոն դրսևորումները, սակայն փորձել է մեղմել իրավիճակը՝ եթե կոռուպցիան կա, և դուք դրա տեղը գիտեք, կամ ԱՄՆ-ի դեսպանը գիտի, թող ասի։ Ես չգիտեմ։
Տնտեսությունը մենաշնորհված է մի քանի օլիգարխի միջև, առանձին ոլորտներ ունեն իրենց «սեփականատերերը», ամեն ոք չի կարող մաքսատնից ինչ ցանկանում է ներկրի, շուկայում թելադրում են ցանկացած գին, կարող են իրացնել ինչ տեսակի և որակի ապրանք ցանկանան, բանկերի տոկոսներն անգամ ամենինչտեսածներին են զարմացնում։
Ավելին՝ նա փորձել է ժխտել ԱՄՆ դեսպանի հայտարարությունը, որ ՀՀ-ում օտարերկրյա ներդրումներ չեն կատարվում կոռուպցիայի պատճառով, նա միանշանակ կողմ է, որ երկիրը պատերազմում է, և դա է ներդրումների պակասի պատճառը։
Ոմանց բախտն ուղղակի բերել է, որ ՀՀ-ն ոչ պատերազմի, ոչ խաղաղության եզրին է․ միշտ հնարավոր է պատերազմի գործոնը չարաշահել և անգամ չամաչել դրա համար։ Հաճախ է սահմանային անվտանգության խնդիրը դառնում «կրուտիտների» հիմք, որն, իհարկե, չի խոսում նման միտք չարաշահողների լավագույն որակների օգտին։
Նմանօրինակ հայտարարությունը թողնում են Գալուստ Սահակյանի ուսերին, քանի որ նա հայտնի է իր օյինբազություններով, ոչ հստակ խոսելաոճով և թողնում է անլուրջ անձի տպավորություն։
Իհարկե, մեղավորը Գալուստ Սահակյանը չէ, այլ նա, ով ԱՄՆ դեսպանի բավականին լուրջ մեղադրանքը ՀՀ իշխանություններին հասցեին թողել են պատասխանելու, ոչ թե քիչ թե շատ կայուն գործչի, այլ ընդամենը Գալուստ Սահակյանին։