Մարգարիտ Եսայանի «սապոնի դոզան» ու սերենադն՝ ուղղված Կոստանյանին
Սերը քաղաքական կատեգորիա չի ճանաչում և կույր է։ Այս թեզը հերթական անգամ հաստատվեց Ազգային ժողովում, երբ ԱԺ պետաիրավական հարցերի և մարդու իրավունքների պաշտպանության հանձնաժողովի նախագահի թեկնածու առաջարկվեց նախկին դատախազ Գևորգ Կոստանյանը։
Կարծիքների արտահայտման ժամանակ Մարգարիտ Եսայանի սիրային զեղումները տեղի տվեցին։ Դա Մարգարիտ Եսայանի անթաքույց սե՞րն էր Գևորգ Կոստայանի նկատմամբ, թե՞ պարզապես մի լավ «օճառվելու» առիթ, սակայն նա ժլատ չգտնվեց իր պերճաշուք խոսքի մեջ։ Եսայանը նախ հանդես եկավ «մեղայական» տեքստով՝ մոտավորապես «ապաշխարելով» այն բանի համար, որ երբ Կոստանյանի թեկնածությունն առաջադրվում էր Գլխավոր դատախազի պաշտոնում, ինքը հայտարարել է.
«Գլխավոր դատախազներն ընդհանրապես սիրելու բան չեն»։
Այժմ «զննելով և ուշադրության կենտրոնում պահելով» Կոստանյանին՝ Եսայանը զղջացել է իր խոսքերի համար։ Նա հասկացել է, որ տակավին երիտասարդ Կոստանյանը «պատվով է տարել իր բեռը»։ Նա ափսոսանքով նկատեց, որ երևի Կոստանյանը չունի իր խոսքերի կարիքը։
«Դուք սիրված եք․․․ կարծում եմ ՝Դուք ավելիին եք արժանի»։
Ապա ի լրումն՝ հավելեց․
«Պարոն Կոստանյան, ուրախ եմ, որ այստեղ եք, Ձեր մարդկային տեսակն էլ է ինձ սրտամոտ, էն էներգիան, որ ունեք, էն ջիղը, որը կա, ինձ սրտամոտ է․․․ Դուք ճիշտ, դուխով, թափով առաջ գնացող քաղաքական գործիչ եք»:
Այն, որ Մարգարիտ Եսայանը «սապոնի դոզան» չարաշահել էր, երկրորդ կարծիք լինել չի կարող, սակայն ինչ-որ մեկից ինչ-որ բան ակնկալող հանրապետականների մոտ միշտ էլ այդ «դոզայի» չափաբաժինը գերակշռում է։
Անկեղծ լինելու համար, հիշեցման կարգով պետք է ասել պարզապես, որ Գևորգ Կոստանյանը կոռումպացված դատական համակարգի հայելին է։ Նրա նշանակումը անկեղծ և առանց ավելորդ օճառապղպջակների կարելի էր հրամցնել այն դեպքում, եթե նաև հենց այս էներգիայով լեցուն ու տակավին երիտասարդի ջանքով, այդքան արմատավորված չլիներ կոռուպցիան՝ իր բոլոր դրսևորումներով: Նույն այս տակավին երիտասարդի ակտիվ մասնակցությամբ են դատ ու դատաստանից ազատվել օլիգարխների այլասերվածներն ու անմեղների «գլխին են կոտրվել» նրանց հանցագործությունները։ Եվ ընդհանրապես, այն էլ Մարգարիտ Եսայանի համար, շատ խելք պետք չէ հասկանալու համար, թե ինչ միջոցներով ու իր մատուցած ո՛ր ծառայությունների համար է Կաստանյանն առաջ գնացել։
Տիկին Եսայանն, իհարկե, գիտի, որ Կոստանյան կաղապարի տակ, մարդ տեսակն իսպառ բացակայում է։ Նա նաև տեղյակ է, թե ինչ նպատակով է նախկին դատախազը նշանակվել նոր պաշտոնում․ այստեղ սև գործեր քողարկելու համար նրա ձեռքերն ավելի երկար են։
Ու Մարգարիտան դա հասկանում է, և ԱԺ ամբիոնից նրա սերենադն ուղղված Կոստանյանին՝ ինքնանպատակ չէր։