Քանի դեռ Ադրբեջանը շարունակում է հայատյացության քաղաքականությունը, Հարավային Կովկասում վտանգված է խաղաղությունը. Շավարշ Քոչարյան
Երեք տասնամյակ առաջ արցախահայությունը հայտ ներկայացրեց անվտանգ ապրելու իր հայրենիքում և որոշելու իր ճակատագիրը սահմանելու պետականակերտման իր արժեհամակարգը, զարգացման ուղիները: Սակայն, երեսուն տարի առաջ այս օրերին գրվել է նաև մեր տարածաշրջանի պատմության ամենամութ էջերից մեկը, երբ Արցախի ժողովրդի սեփական ճակատագիրը տնօրինելու խաղաղ պահանջներին ի պատասխան՝ Ադրբեջանի իշխանությունների կողմից փորձ կատարվեց լռեցնել արցախահայությանն Ադրբեջանի ողջ տարածքում հակահայկական ջարդերի ալիքով: Այդ մասին այսօր «Սումգայիթյան ջարդեր. Հայատյացությունը որպես Ադրբեջանի պետական քաղաքականություն» թեմայով խորհրդարանական լսումների ժամանակ ասաց փոխարտգործնախարար Շավարշ Քոչարյանը:
Նրա խոսքով՝ այս քաղաքականության առաջին դրսևորումը եղավ Ստեփանակերտի ցույցերից հարյուրավոր կիլոմետր հեռավորության վրա գտնվող Սումգայիթ քաղաքի խաղաղ հայ բնակչության դեմ ուղղված ջարդերը: Այդ բռնության ալիքը շարունակվեց Ադբեջանի այլ բնակավայրերում՝ Կիրովաբադում, Բաքվում:
«Ատելության և հայատյացության այս քաղաքականություննն այսօր դարձել է Ադրբեջանի ղեկավարության ներքին և արտաքին քաղաքականության անքակտելի մաս, որի վրա նրանք կառուցում են ադրբեջանցի ժողովրդի ինքնագիտակցությունը և կայացումը: 30 տարվա ընթացքում Ադրբեջանի ղեկավարության գործելակերպը չի փոխվել. մենք դրան ականատես եղանք 2013թ., երբ հայ սպա Գուրգեն Մարգարյանին կացնահարելու համար դատապարտված Ռամիլ Սաֆարովն Ադրբեջան վերադառնալուն պես ազատ արձակվեց և հերոսացվեց»,- ասաց Քոչարյանն ու հավելեց, որ 2016թ. ապրիլյան քառօրյայի ընթացքում աշխարհը նորից ականատես եղավ հայերի հանդեպ Ադրբեջանի հասարակության քարանձավային դրսևորումներին՝ ուղղված թե՛ խաղաղ հասարակության, թե՛ ռազմագերիների դեմ:
Եզրափակելով՝ փոխնախարարը նշեց, որ Ադրբեջանը ևս մեկ անգամ ապացուցեց, որ քաղաքակիրթ աշխարհի կանոնները, «միջազգային հումանիտար և մարդու իրավունքների նորմերն այդ երկրի իշխանությունների համար դատարկ հնչյուններ են»: Ադրբեջանի իշխանությունները, հակադրվելով միջազգային հանրության և ԵԱՀԿ Մինսկի խմբի համանախագահ երկրների կոչերին՝ հասարակությունները խաղաղության պատրաստելու փոխարեն՝ շարունակում են իրենց ռազմատենչ և առավելապաշտական քաղաքականությունը:
«Միջազգային մեր գործընկերների մոտ հասունացած է այն գիտակցությունը, որ քանի դեռ Ադրբեջանի իշխանությունները շարունակում են հայատյացության քաղաքականությունը, Հարավային Կովկասում վտանգված են կայունությունը, խաղաղությունը և անվտանգությունը»,- ասաց Քոչարյանը: